A Primera División está a 40 minutos para o Marín Futsal. O equipo galego só debe gañar un partido máis para ser conxunto da máxima categoría do fútbol sala español. Na vindeira fin de semana, o conxunto de Raúl Jiménez poder ser equipo da división de ouro, se vencen ao Joventut D’Eix.
As marinenses lograron o histórico pase á Fase Final do play-off de ascenso tras vencer na terceira eliminatoria ás galegas do Valdetires FSF. O encontro, cun ritmo frenético, celebrouse no pavillón do Esteiro e rematou cun 4-9. O formato da competición quixo que a terceira rolda, con eliminatoria a partido único, chegara cun duelo galego, tras a vitoria de ambos equipos ante Rodiles e Txantrea.
Agora, o Marín Futsal viaxará ata Madrid para disputar o ascenso na Ciudad Deportiva de Las Rozas. Os equipos competirán nesta Fase Final por orde de coeficiente, entre o número de puntos obtidos e o número de partidos competidos.
O Marín terá opción de ascenso directo ou promoción
O rival das galegas será o Joventut D’Eix, mentres que a outra semifinal enfrontará a Colmarejo e Atlético Torcal. Os dous equipos gañadores ascenderán directamente á Primera División.
Os dous perdedores deberán competir a Fase de Promoción na seguinte fin de semana, a do 19 e 20 de xuño, ante Penya Esplugues ou Viaxes Amarelle, equipos da máxima categoría que están en perigo de descenso. Os vencedores desta fase terán praza na Primera División, e os derrotados na Segunda.
