Na súa última saída, o Muralla Galicia Emerging colleitaba unha contundente derrota. Caían diante do AVIA Eibar Rugby Taldea por un tanteo de 95-5. Un único ensaio do bando galego fala dun escaso acerto ofensivo, pero o resultado da contención do rival, que foi quen de anotar 16 ensaios e sumar transformacións ata en sete ocasions, tampouco ten unha lectura positiva.
Esta xornada, as galegas xogan en casa, nas Pedreiras. Reciben ao XV Hortaleza RC o domingo ás 12:00 horas. Seguramente o rival sexa o de menos, por que onde teñen o maior reto as xogadoras do cuadro lucense é con elas mesmas e o rugby que agochan e precisan sacar á luz.
Non cabe dúbida que un triunfo sería un resultado sanador, pero a este bloque abondaríalle con verse no espello amosando unha mellor capacidade de competición. Téñena, pero non están sendo quen de sacala para fóra e iso faille febles máis aló do rival que teñan en fronte.
Este grupo de xogadoras de rugby chegadas de diferentes puntos da xeografía galega, son mellores do que amosan os números que están a colleitar nesta División de Honor B. Pero lles está a custar dar a súa mellor faciana sobre o tepe. Logo dos resultados colleitados ata o de agora, o obxectivo é, obviamente a permanencia.
Tres baixas e unha xogadora recuperada para o Muralla
Para o enfrontamento desta quinta xornada, as xogadoras que adestra a dupla formada por Rogelio Sabio e Jos Portos teñen ausencias e retornos. Así, serán baixa no Muralla RC para este partido co XV Hortaleza RC Carmen e Gelu, que segue sen poder ser da partida. Tampouco estará a capitá, Divi, que ten fracturados os osos do nariz logo do partido en Eibar. Como contrapartida, o bloque lucense recupera a Alba que levaba fóra de competición desde o 22 de decembro por unha rotura de fibras.
As galegas son penúltimas na táboa clasificatoria. O seu ser ou non ser será na última xornada. Un partido que se xogará a vida ou morte, a permanencia ou descenso. Será elas, ou Murcia. Non haberá volta de folla nin segundas voltas.
Todos os cruces que teñen por diante ata ese momento son, case, un exercicio de preparación de cara ao partido da tempada. Pero tamén unha ocasión de atoparse a si mesmas a tempo de afrontar con confianza ese duelo coas últimas clasificadas.
O partido desta semana será no Gregorio Pérez Rivera de Lugo. Arbitrará o choque Elisabet Martínez, e poderá seguirse online pola canle de YouTube do Muralla RC.
