O HC Deportivo Liceo venceu na pista do Garatge Plana Girona CH por 1-5. O equipo que adestra Stanis García sumou así o seu segundo triunfo consecutivo e alcanzou o seu pase para disputar a vindeira Copa da Raíña de hoquei a patíns.
As verdibrancas, tras este triunfo en Girona suman 19 puntos e ubícanse sétima posición da OK Liga Feminina.
O partido, desigualado polas situacións clasificatorias de cada contendente (as locais eran e son colistas), estivo claramente dominado polas galegas. Tardaron dous minutos en adiantarse as liceístas mediante un tanto asinado por Alba Garrote. Desde ese intre, someteron ao Garatge Plana Girona CH que xerou moi pouco perigo á zaga. O descanso, aínda así, chegouse sen máis goles, cun curto 0-1 a favor das herculinas.
O Liceo remata na segunda metade
Tampouco existiron na primeira metade do segundo acto, aínda que a iniciativa non trocou de dono. O HC Deportivo Liceo logrou quitar o tapón a falta de trece minutos para o final, cando anotou o 0-2 mediante Adriana Soto.
A partir dese momento forn caendo os goles. O 0-3 foi de Alba Garrote, e o 0-4 de Adriana Soto. Así, ambas as dúas xogadoras facían dobrete ante a meta rival. As locales conseguiron o gol da honra, foi no minuto 48 por medio de Estel Forns, pero a xogadora coruñesa María Sanjurjo matou o partido co 1-5.
O vindeiro compromiso liceísta será de máximo nivel: recibir ó Martinelia CP Manlleu no Pazo dos Deportes de Riazor, na Coruña.
FICHA TÉCNICA
1) GARATGE PLANA GIRONA CH: Elia Blade; Mariona Mora, Julia Canal, Estel Forns e Marina Monge – quinteto inicial -. Tamén xogaron: Mireia Arranz, Ivet Jiménez, Jana Crespo e Sara Céspedes.
5) HC DEPORTIVO LICEO: Viki Caretta; Bea Gaete, Adriana Soto, Alba Garrote e María Sanjurjo – quinteto inicial -. Tamén xogaron: Ale Martín, Cris Diz e Mencía Mosquera.
ÁRBITRO: Bravo Carrasco. Non amosou cartóns.
GOLES: 0-1 (Alba Garrote, min. 2). 0-2 (Adriana Soto, min. 37). 0-3 (Alba Garrote, min. 43). 0-4 (Adriana Soto, min. 44). 1-4 (Estel Forns, min. 48). 1-5 (María Sanjurjo, min. 50).
INCIDENCIAS: Xornada 11 da OK Liga Feminina 21/22. Municipal Palau II.
