A 16ª xornada da Superliga Feminina 2 de Voleibol foi beneficiosa para o CV Leganés, mais non para o Autos Cancela Zalaeta. As galegas caeron derrotadas na súa cancha do Barrio das Flores coruñés por 1-3. O primeiro set foi para as madrileñas, empataron as herculinas e o terceiro set foi o que rompeu o partido. Leváronno as visitante e con el fóronse os folgos do Zalaeta que o deu todo na loita dun punto que finalmente puxo rumbo a Leganés.
O CV Leganés, colocado na terceira praza, soña co ascenso pero faino a costa de ter vencido ás galegas do Autos Cancela Zalaeta. As coruñesas exercían de anfitrioas e cederon o primero set cun 20-25. Remontaron no segundo empatando o choque até o 1-1, logo dun tanteo de 25-17.
E chegou o terceiro set, o que marcou o partido totalmente. A loita foi titánica entre coruñesas e madrileñas que se alternaban por diante no electrónico e que foron sumando puntos e puntos sen que ningunha das dúas escuadras conseguise os dous de vantaxe que lles outorgase o global do partido. Ata catro puntos set tiveron ambos os dous equipos. Polo que o set podería ter sido para calquera dos dous equipos. Superada a barreira dos 30 puntos, o set caeu do lado das madrileñas que o levaron por 30-32.
A loita por ese 1-2 foi extenuante e resultou un mazazo para as galegas que se tiñan baleirado completamente na pista sen que o seu esforzo frutificase. Así, no cuarto e definitivo set, as de Jorge Barrero non poideron seguir o ritmo do set previo e foi o CV Leganés o que marcou o ritmo e se fixo co trunfo por un resultado de 18-25.
Con esos tres puntos que levaron da Coruña, sumados a que o CV Sestao endosoulle a primeira derrota da tempada ao VP Madrid, o CV Leganés recurtou distancias cos postos de cabeza e gaña enteiros no seu soño para acadar o ascenso.
Por contra, as galegas do Autos Cancela Zalaeta colócase na sétima praza con 20 puntos. As coruñesas enfróntanse a vindeira xornada co Vóley Sanse Live Vuvuzela que está noveno con 15 puntos. Será o domingo 21 de febreiro ás 13:00 horas, no Pavillón Eduardo López Mateo de San Sebastián de los Reyes (Madrid).
FICHA TÉCNICA
1) AUTOS CANCELA ZALAETA: Bermejo, Alba Quirós, Andrea Rivas, Guzzi, Laura Vázquez e María Forteza – Rey – sexteto inicial-. Tamén xogaron: Patri Santos, Claudia Gómez, Noemí Sánchez, Paula Lorenzo, e Carmen Carvajal.
3) CV LEGANÉS: Olivia Isidro, Marta Olmedo, Lorena Rubiera, Tortarolo, Laura Almazán e Nada Essayadi – sexteto inicial-. Tamén xogaron: Alba Velázquez, Inés de la Peña, Noelia Tejero, Alejandra Salleras, María Elizaga, María Curto.
SETS: 20-25 / 25-17 / 30-32 / 18-25.
ÁRBITROS: Carlos Alberto Cordeiro Fervenza.
INCIDENCIAS: Partido da 16ª xornada na Superliga Feminina 2 Grupo A RFEVB celebrado no Pavillón Polideportivo do Barrio das Flores, na Coruña. O partido disputouse a porta pechada por mor das restricións que están agora mesmo activas en Galicia para frear a curva de contaxios da COVID-19.
