O Viajes Interrías FF chegou á segunda fase como campión do grupo 1A e no 1C continúa o seu bo momento de forma. Na primeira xornada, as xogadoras de Portonovo foron quen de vencer, non sen un pouco de sufrimento, ao Racing Féminas B, cun resultado final dun 2-1.
Atendendo aos coeficientes que marcan a clasificación, as galegas son segundas cun 2,353, por detrás do Oviedo, cun 2.400. En terceira posición está o Victoria, tamén cun 2,353.
Así foi o estreo do Interrías na segunda fase
Nos primeiros compases do partido as ocasións foron para as asturianas, que tiveron ocasións claras de poñerse por diante. Porén, o cadro local mantívose forte e tamén tivo oportunidades para golear, sorbe todo da man de Connie e Lola.
O Interrías ameazaba con acertar fronte á portería e o primeiro tanto non se fixo esperar. Antes de cumprir os primeiros 30 minutos de xogo, unha xogada de balón parado deu o gol ás locais, tras tocar o balón na cabeza de Aroa que marcaba en propia porta. O perigo seguía presente en ambas áreas, pero o descanso chegou o marcador inmóbil.
Tras o paso por vestiarios, o Viajes Interrías FF apuntaba a polo segundo gol. Este chegaría, de novo, desde o balón parado, nunha falta en mediocampo rematada a pase de Balo por Judit. O partido semellaba sentenciado, pero o Racing tiña máis que dicir. A falta dunha media hora de encontro, Naiara foi quen de superar a Isa Martín e marcar pola escuadra para poñer o 2-1 e aumentar a tensión do duelo.
Porén, o cadro de Luís Treviño foi quen de manter o sangue frío e salvou dúas ocasións claras das rivais que terían dado a volta ao resultado. O encontro rematou co 2-1.
A valoración de Luís Treviño
Para o adestrador do conxunto de Portonovo, Luís Treviño, este partido non se presentaba como nada doado. “Xogabamos contra un equipo que non tiña presión ningunha, viña a gañar o partido, a darse a ver, xa que non lles inflúe, saben que non van ascender neste ano”.
En palabras de Treviño, o plantel do Racing está conformado por “xogadoras xoves sen complexos, que empezaron moi ben e a nós custounos 10 minutiños entrar no partido. A partir de aí marcamos o ritmo do partido ata que nunha xogada desgraciada metéronnos o gol cando íamos 2-0 e dominando”. Isto cambiou o ambiente que se respiraba sobre o verde, xa que ás futbolistas do Viajes Interrías FF, “entroulles o medo”. Como xogamos cunha presión engadida de non fallar, moitas xogadoras non están acostumadas a esa presión e sufrimos”.
Con todo, o adestrador do Viajes Interrías celebra o resultado, xa que “o obxectivo era gañar. Levabamos 15 días sen competir pola configuración do calendario e non é fácil gañar despois dun parón. As futbolistas loitaron e sacrificáronse e agora a pola segunda xornada”.
