A Xunta de Galicia deu inicio á ampliación do Instituto Feiral de Vigo (IFEVI) en 5.500 m². Este mércores 5 de maio comezaron as obras, coas que se prepará o inmoble para acoller eventos de referencia internacional despois do verán e se habilitará na cidade un novo espazo para o deporte. Os traballos xerarán unha zona de atletismo, dotada dunha pista de 60 metros de lonxitude e 6 rúas. Será unha pista cuberta, de xeito que os usuarios poderán adestrar con independencia do tempo e sen límite de capacidade.
O plan do goberno galego proxecta que o novo IFEVI dea servizo a arredor de 1.000 atletas repartidos entre os 15 clubs da área de Vigo. Os deportistas poderán facer uso no recinto de catro zonas diferenciadas, que se destinarán a lanzamento de peso e á práctica de saltos.
En total, investiranse 7,6 millóns de euros. A Xunta informa de que a actuación permitirá contar cunha nova superficie construída de 6.500 m², dos que 5.500 m² serán de ampliación e uns 1.000 m² corresponderán á reforma do edificio existente.
A ampliación terá lugar na zona traseira do pavillón 3 por contar cunhas características de anchura e altura especialmente adecuadas para os usos previstos. Segundo indicou a conselleira de Infraestruturas Ethel Vázquez na súa visita ás obras, o punto estará conectado ao pavillón actual e na área máis próxima a ese nexo disporanse os servizos necesarios para ámbolos dous. Entre outros, terán aseos, camerinos, calefacción e instalacións eléctricas.
Os primeiros traballos do IFEVI rematarán a mediados de setembro
O obxectivo principal da ampliación do IFEVI é o reforzo das exposicións. O goberno galego pretende que a mediados de setembro estea rematada a envolvente do edificio para dispoñer provisionalmente de superficie expositiva. Deste xeito, poderán festexarse no espazo eventos como Conxemar, Navalia ou Mindtech.
Cando os traballos cheguen á súa fin, a Xunta agarda que o Concello de Vigo dote ao IFEVI dos accesos “de modo acorde á súa potencialidade”. Na visita ao inicio das actuacións, estiveron presentes xunto a conselleira a delegada territorial da Xunta en Vigo Marta Fernández-Tapias, o secretario xeral para o Deporte José Ramón Lete, e o director da Axencia Galega da Infraestruturas, Francisco Menéndez.
