A piques de dar a badalada estivo o HC Deportivo Liceo na súa visita á cancha do Cerdanyola HC. Nesta cuarta xornada da OK Liga as coruñesas volveron amosarse como firmes canditatas a dar guerra nesta tempada 2021-22. Chegaron a empatar dúas veces o partido e finalizaron perdendo so dun gol nunha das pistas máis complicada da categoría (3-2).
🏑 #OkLigaF | Comença el partit!
🆚 @HCLiceoFem #ForçaSarda 💚 pic.twitter.com/Ur7qpzgps8
— Cerdanyola Club d’Hoquei (@cerdanyolach) November 27, 2021
Perderon, si, pero con dignidade e dando a cara. O HC Deportivo Liceo caía derrotado na cancha do Cerdanyola loitando ata o final do encontro por puntuar e incluso dar a badalada no feudo dun dos grandes clubs da OK Liga Feminina.
As coruñesas amosanse unha xornada máis coma un conxunto capaz de xogarlle de ti a ti a calquera rival neste curso. Abriu o marcador Adriana Gutiérrez pola parte das locais aos dous minutos pero outros tantos despois a internacional chilena Bea Gaete (e MVP no Panamericano) devolvía as táboas ao electrónico (1-1). Non foron quen de volver a adiantarse as catalás ata os quince minutos de xogo. Anotou Gemma Solé, que logo de lanzar un penalti, colleu o rexeitamento da bóla e bateu a Viki Caretta.
Xogo alegre do Liceo
O conxunto galego, esta vez vestido coa equipación negra e ouro, volvía á pista do Can Xarau tras do descanso disposto a todo. Sobre a cancha do Cerdanyola HC amosouse como un equipo cun xogo alegre e sen complexos. Atrevidas e á procura do gol nun partido moi igualado e con oportunidades para ambos os dous conxuntos.
Xa na segunda metade Alba Garrote, no 43, devolvía o partido ao empate (2-2) ao transformar unha falta directa, unha situación de xogo na que ten unha das súas grandes armas realizadoras.
Tivo outra falta directa Adriana Soto pero non acabou en gol. Durou pouco no marcador xa que no 44 anotaba o definitivo 3-2 Daiana Silva para o Cerdanyola HC. A falta dun minuto lanzou unha falta directa Gemma Solé pero Viki Caretta impediu o gol.
🏑 #OkLigaF | FINAAAAAL! 💥
Victòria 3-2 davant un dur @HCLiceoFem 💪🏻
Fantàstica feina, equip!! #ForçaSarda 💚🙌🏻 pic.twitter.com/wmn31AUGyH
— Cerdanyola Club d’Hoquei (@cerdanyolach) November 27, 2021
Ao remate desta cuarta xornada na OK Liga Feminina, o HC Deportivo Liceo ocupa a 8 ª praza na táboa clasificatoria pero está a so catro puntos da zona máis calma.
A seguinte parada das liceístas neste complicado calendario de arranque que lles tocou en sorte na OK Liga 2021-22 será no Pazo dos Deportes de Riazor recibindo ao último óso, o máis duro de roer. O vindeiro 4 de decembro visita a cancha coruñesa ás 17:00 horas o Generali HC Palau de Plegamans. Arbitrará o choque o colexiado Pablo Nicieza Elosegui, auxiliado por Diego Garrido Areas.
O Generali HC Palau de Plegamans so perdeu co Telecable, outro dos grandes, e ven de tropezar ao empatar (2-2), sorprendentemente, co CP Las Rozas en cancha propia. Visto o visto, seguramente chegará a medirse coas verdibrancas con moitas ganas de recuperar o camiño dos triunfos e subir na clasificación a postos máis nobres que é onde se espera, sobre o papel, que esté.
Para ese próximo partido xa contará o HC Deportivo Liceo con novo adestrador. Segundo informaba o club herculino, Stanis García sentará no banco do primeiro equipo feminino da entidade desde mañá luns 29 de novembro.
FICHA TÉCNICA
CERDANYOLA CH: Mariona Suros; Joana Xicota, María Figuerola, Adriana Gutiérrez e Gemma Solé – quinteto inicial -. Tamén xogaron: Daiana Silva, Natalia Crespo, Abril Battle e Ariadna
Carrión.
CH DEPORTIVO LICEO: Viki Caretta; Bea Gaete, María Sanjurjo, Alba Garrote e Adriana Soto – quinteto inicial -. Tamén xogaron: Ale Martín, Naiara Vaamonde, Lucía Yáñez e Cris Diz.
GOLES: 1-0 (Adriana Gutiérrez, min. 2). 1-1 (Bea Gaete, min. 4). 2-1 (Gemma Solé, min. 15). 2-2 (Alba Garrote, min. 43). 3-2 (Daiana Silva, min. 44).
ÁRBITRO: Francisco Moreno Tudela. Amosou cartón azul á patinadora local Gemma Solé e á xogadora visitante Adriana Soto.
INCIDENCIAS: Xornada 4 ª da OK Liga Feminina da FEP 2021/22. Encontro disputado no Pavelló Esportiu Can Xarau de Cerdanyola.
