Esta pode ser unha xornada chave para que o conxunto do HC Deportivo Liceo se confirme como o máis firme candidato ao ascenso. As coruñesas, líderes invictas, visitan as segundas clasificadas, o CP Alcorcón. De gañar, a distancia coas súas inmediatas perseguedoras medraría até os sete puntos. O partido xogarase hoxe, sábado 15 de maio, ás 18:00 horas na pista das madrileñas.
As patinadoras que adestra Carlos Loureiro son o equipo menos goleado con so tres goles encaixados. No seu anterior choque, colleitaron un empate a cero goles ante outro dos clubs da zona de Madrid que aspira, como as liceístas a dar o salto á máxima categoría.
Pola súa parte, o CP Alcorcón é o conxunto cunha maior diferencia positiva entre goles a favor (44) e en contra (8) ao obter un saldo no seu haber de 36 tantos. No seu último partido as madrileñas goleaban 11-1 ao CPP Raspeig ao que as xogadoras do HC Deportivo Liceo venceron na súa cancha 1-7.
En liza, a novena xornada da Ok Liga Prata feminina na que o conxunto coruñés quererá manterse invicto, e incrementar a súa ventaxe co CP Alcorcón, e o outro equipo coruñés, o HC Borbolla que é terceiro na táboa, ademais de co cuarto en discordia, o CP Las Rozas. Son eses catro bloques os aspirantes as dúas prazas que dan acceso ao ascenso de categoría.
Descansan as tomatitas do HC Borbolla
Nesta semana, toca descanso para o Hockey Club Borbolla que adestra o técnico coruñés Santi Martínez, como deciamos antes, o outro equipo que representa a Galicia na Ok Liga Prata feminina de Hoquei sobre patíns.
