O HC Deportivo Liceo visita, nesta oitava xornada da OK Liga Iberdrola, ao CP Vila-Sana. O partido xógase hoxe sábado 3 de decembro a partir das 19:00 horas.
Trátase dun cruce importante para as aspiracións do bloque de patinadoras que adestra Stanis García. O CP Vila-Sana é un dos rivais directos das coruñesas na loita por entrar nos play-offs polo título de liga este curso 2022-23.
Non podería chegar en mellor momento anímico o HC Deportivo Liceo xa que as galegas conseguían unha vitoria épica a pasada semana ante o CP Voltregá Stern Motor. A dous minutos do final do partido as verdibrancas perdían 2-4. Pero eses dous minutos abondaron ás galegas para darlle a volta ao resultado nun final dos que fan afección e demostran que ningún partido remata ata que soa a bucina. María Sanjurjo e Bea Gaete foron as autoras dunha remontada histórica.
O 3-4 anotábao a chilena e abría o camiño á esperanza. Os outros dous tantos correron a cargo da coruñesa María Sanjurjo. O partido remataba 5-4.
Nesta oitava xornada o HC Deportivo Liceo visita ao CP Vila-Sana que vai segundo con dez puntos máis no seu haber que as galegas que son oitavas. O cruce do Mataró co Telecable podería axudar ás galegas a subir na táboa se saen vitoriosas da visita ao CP Vila-Sana.
