Da súa primeira saída o HC Deportivo Liceo regresa con derrota. A visita á pista do Martinelia CP Manlleu, vixente campión da Copa, rematou cun 3-1 a favor do cadro local. Este é o primeiro tropezo das verdibrancas na Liga nesta tempada de 2021-22. Un tropezo que entraba dentro dos cálculos pero que sucede xusto logo dunha semana convulsa na que o técnico, Carlos Loureiro, renunciaba ao seu posto por non estar dacordo coas “condicións de traballo plantexadas polo club”. A entidade verdibranca ofrecía explicacións en rolda de prensa.
Baixo a batuta do dúo conformado polos delegados Noemi Uzal e Marc Godayol o conxunto galego saltou a pista mermado polas ausencias da capitá Luchy Paz, e a internacional chilena Bea Gaete (autora dun dos cinco goles da primeira xornada).
O partido empezou con intensidade por ambas escuadras e con faltas cortando o xogo tanto polas coruñesas como polas catalás.
As xogadoras que adestra Jordi Boada non son un rival doado e demostraron sobre a pista a súa capacidade e nivel. Tamén fixeron valer o factor cancha e puxéronse por diante no marcador no minuto 14 de xogo. Foi cun tanto de Ana Casaramona que chegou pouco despois dun tempo morto pedido polo técnico local. Joana Comas sumou un tanto máis á conta local a falta de 6 minutos para o descanso (2-0).
Un minuto despois, no 19, Adriana Soto anotaba para o HC Deportivo Liceo recurtando distancias (2-1) e mantendo vivo ao conxunto galego de cara á segunda metade. A xogadora arxentina xa tiña marcado por partida dobre na primeira xornada polo que atesora tres goles en dous partidos e toma protagonismo como rematadora verdibranca.
Viki Caretta volveu ser unha das xogadoras destacadas nas filas liceístas. A cancerbeira parou moitas das chegadas do Martinelia CP Manlleu. Ana Casaramona, que xa abrira o marcador, foi quen asinou o 3-1 no minuto 37 de partido co que se pechou o tanteo do partido. A 40 segundos do final, Adriana Soto tería a posibilidade de transformar unha falta directa que non puido converter en gol.
O HC Deportivo Liceo é quinto e recibe ao líder
Unha vitoria e unha derrota é polo tanto a vagaxe das liceístas no que vai de tempada. Esto colócaas, no momento de escribir esta información, na quinta praza da clasificación na OK Liga. O Martinelia CP Manlleu é segundo, superado unicamente polo Telecable HC Gijón. As asturianas son, xustamente, as seguintes rivais das galegas. A terceira xornada da OK Liga feminina terá lugar para as liceístas o sábado 20 de novembro ás 20:00 horas no Pazo dos Deportes de Riazor.
As asturianas do Telecable HC veñen de vencer 7-0 ao conxunto de Las Rozas. Velaí os mellores momentos dese partido da man de Hockey Global.
Resultados da 2ª Xornada da OK Liga Feminina
- MARTINELIA CP MANLLEU DEPORTIVO LICEO 3 – 1
- TELECABLE HC CP LAS ROZAS 7 – 0
- CP VILA-SANA CP VOLTREGA STERN MOTOR 3 – 1
- CERDANYOLA CH FENÍE ENERGÍA GENERALI HC PALAU DE PLEGAMANS 1 – 3
- IGUALADA FEMENI HCP PHC SANT CUGAT 3 – 2
- CHP BIGUES I RIELLS CP VILANOVA 3 – 2
- GARATGE PLANA GIRONA CH LIDERGRIP CH MATARO (pte.)
FICHA TÉCNICA
3) CP MANLLEU: Anna Ferrer; Nara López, Ona Castellví, Elisabet Gurri e María Díez – quinteto inicial – Joana Comas, Ana Casaramona, Anna Bulló e María Anglada.
1) DEPORTIVO LICEO: Viki Caretta; Ale Martín, María Sanjurjo, Alba Garrote e Adriana Soto – quinteto inicial – Naiara Vaamonde, Lara Yáñez, Lucía Yáñez e Cris Diz.
ÁRBITRO: Xavier Valiente Soler, colexiado principal. Manel Blat Guimerá, colexiado auxiliar. Cronometrador Miquel Piqué Montagut. Sen tarxetas.
GOLES: 1-0 (Anna Casaramona, min. 14). 2-0 (Joana Comas, min. 18). 2-1 (Adriana Soto, min. 19). 3-1 (Anna Casaramona, min. 37).
INCIDENCIAS: Segunda xornada da OK Liga Femenina da FEP 2021-22. Encontro disputado no Pavelló Municipal de Manlleu.
Emilio Fernández: “Non hai discriminación co equipo feminino, hai desigualdade”
