O conxunto do HC Coruña visita a pista do Oxigen PHC Sant Cugat coa moral alta logo de acadar a súa primeira vitoria da tempada 2025-26 na Ok Liga Iberdrola. O cruce, correspondente á quinta xornada, está previsto para mañá, sábado 1 de novembro, a partir das 19:45 horas.
Ver esta publicación en Instagram
As coruñesas que adestra Stanis García vencía na pasada xornada no Pazo dos Deportes de Riazor por 4-0 ao Ene Oposiciones CP Mieres. Esa vitoria foi fundamental, non só polos tres puntos en xogo, por ser a primeira, ou por terse dado diante dun rival directo, o certo é que ese partido foi tamén unha proba de que o HC Coruña pode amosarse seguro na zaga.
O partido contra o Ene Oposiciones CP Mieres foi unha exhibición de solidez defensiva das galegas. Foi a primeira vez deste curso no que as coruñesas rematan o partido coa súa portaría imbatida.
Por outra banda o acerto goleador de xogadoras do HC Coruña como Rebeca González, que anotaba dous tantos, Anna Bulló e Jana Castro, foi tamén unha boa nova no cadro herculino.
Con esa vitoria o HC Coruña ascendeu na táboa da Ok Liga Iberdrola situándose na parte baixa-media (9.º posto). Un respiro clasificatorio pero sobre todo un impulso cara a unha dinámica positiva agora que atoparon o camiño do triunfo. Cómpre non saírse do camiño de pedras amarelas como dirían no Mago de Oz.
Ver esta publicación en Instagram
O conxunto que prepara Stanis García non poderá contar unha vez máis coa dianteira catalá Berta Ribas apartada das pistas por mor dunha lesión de longa duración.
Pola súa parte, o Oxigen PHC Sant Cugat, rival das galegas esta xornada, buscará recuperar terreo. As catalás afrontan o cruce coas galegas coa obriga de sumar diante dos seus seareiros. Chegan a esta quinta xornada logo de perder na cuarta por 4-0 diante do Cata CP Voltregà.
Neste momento da competición o Oxigen PHC Sant Cugat ocupa o posto antepenúltimo na táboa clasificatoria e non ten sumado ningún punto.
Nas filas milita unha patinadora coñecida pola afección herculina, Cris Diz.
Esta é a convocatoria do HC Coruña do técnico Stanis García:
Ver esta publicación en Instagram
