O HC Coruña volve ao Palacio dos Deportes de Riazor para enfrontarse esta fin de semana ao CP Vila-Sana Coop D’Ivars , un dos equipos máis potentes da OK Liga Iberdrola e vixente campión da Copa Intercontinental disputada en San Juan en 2024. As coruñesas teñen ante delas un reto maiúsculo ao que chegan coa moral alta tras lograr a súa primeira vitoria a domicilio da tempada 2025-26. O partido dispútase hoxe sábado 6 de decembro a partir das 16:30 horas.
Este encontro supón o inicio do temido Tourmalet para o cadro herculino: unha cadea de partidos fronte a rivais da zona nobre como Vilasana, Telecable, Manlleu, Voltregà, Fraga, Bembibre e Palau (estes tres últimos xa na segunda volta). Unha travesía esixente onde cada punto pode ser ouro.
O triunfo fóra de casa acadado polo HC Coruña foi un auténtico bálsamo a nivel clasificatorio anímico. O equipo coruñés reencontrouse con sensacións positivas e móstrase motivado para dar a cara diante un dos xigantes da OK Liga Iberdrola.
Pola súa banda, o CP Vila-Sana Coop D’Ivars aterra na Coruña cun bloque de xogadoras repleto de talento e situada na cuarta posición. Acumula dúas derrotas na competición: a xa coñecida por aliñación indebida na primeira xornada e a recente diante o líder, CP Fraga. Un conxunto que destaca polo seu poder ofensivo e a súa experiencia en citas de máxima esixencia.
No apartado local, o HC Coruña afronta o partido con dúas ausencias importantes: a xa coñecida baixa de longa duración de Berta Ribas e a de Daniela por motivos persoais. Aínda así, as coruñesas confían en facer valer o factor pista e a enerxía de Riazor para tentar puntuar e seguir crecendo como equipo.
