En realidade as xogadoras do HC Borbolla non se poden permitir perder ningún dos puntos en xogo, pero se hai un partido non que un tropezo sería fatal é este da xornada sétima da segunda fase da competición na Ok Liga feminina. O rival é o Areces Ecopilas Asturhockey que é colista e está cun pé e medio na categoría autonómica. As galegas son, neste momento, penúltimas.
A cita está fixada para o vindeiro sábado 17 de abril ás 20:00 horas na cancha das asturianas, o Pavillón Polideportivo Municipal de Grado. Dirixirá o encontro entre Areces Ecopilas Asturhockey e HC Borbolla o colexiado Íñigo Maestro Sastre que terá como auxiliar a Isaac Sanz Rodríguez
As asturianas remataron a primeira fase como colistas do seu grupo e nesta segunda fase competitiva na Ok Liga seguen a ocupar o posto de faroliño vermello no grupo D, que é o que xoga pola salvación.
Con todo, se en algo parecen expertas as patinadoras do Areces é xustamente en gañar ante rivais directos da zona baixa. Xa na primeira fase colleitaron un solitario trunfo e foi contra o CP Vilanova (1-4). Agora, nesta segunda fase da competición, so conseguiron gañar ao CP Alcorcón pola mínima (6-5).
A máxima anotadora do Areces é Adriana García
A xogadora con máis goles anotados no conxunto do Areces é Adriana García Díaz con 19 tantos, seguida de Silvia Cadrecha con 11 e Sara Fernández con 9.
As coruñesas do HC Borbolla venceron nesta segunda fase ao Igualada Feminí HCP (4-1), ao propio Areces Ecopilas Asturhockey na primeira volta (4-1). Durante as tres últimas xornadas enlazaron unha serie de derrotas que as foi metendo na xona baixa da táboa. Caeron co CP Vilanova pola mínima (1-0), co Igualada Feminí HCP (5-2) e co CP Esneca Vila-Sana co que nesta fase perderon os dous cruces (3-2 e 1-3).
As coruñesas do Borbolla teñen a salvación a catro puntos e lles quedan dous partidos, este enterras astures e o último co CP Vilanova. A permanencia na elite estatal do hoquei a patíns feminino está en xogo.
Santi Martínez: “Non teñen presión e iso vai facer que xoguen con máis liberdade”
O adestrador do HC Borbolla, Santi Martínez, ten a todas as súas xogadoras disponibles para este partido crucial nas aspiracións das tomatitas de manter a categoría.
Na opinión do técnico galego, o feito de que xa esté todo decidido para o Areces Ecopilas Asturhockey converte ao equipo asturiano nun rival aínda máis complicado. “Xa están descendidas, polo que se fan moi perigosas. Xogan sen presión, nin necesidade de gañar, iso vai facer que xoguen con máis liberdade, sen presións e ademais quererán despedirse da Ok Liga na súa casa cun triunfo”.
Na definición do xogo do rival desta fin de semana na Ok Liga feminina, Santi Martínez explica que o Areces de Grado é un equipo ao que “lle gusta o xogo directo, os contragolpes rápidos e os unha para unha das súas xogadoras máis habilidosas. É un equipo perigoso que non tivo demasiada fortuna en moitos partidos nesta tempada”, considera o adestrador do Hockey Club Borbolla.
Segundo explica Santi Martínez, ao Areces Ecopilas Asturhockey: “Gústalle o xogo directo, os contragolpes rápidos e os unha para unha das súas xogadoras máis habilidosas”
Consultado sobre esa mellor cara amosada polas patinadoras do equipo asturiano do Areces Ecopilas Asturhockey xustamente ante rivais directos, como foi o caso do CP Alcorcón ou o CP Vilanova, Santi Martínez argumenta que nesta tempada 2020-21, “houbo moita igualdade. Entre sete ou oito equipos podía darse calquera resultado. Eso pódese comprobar no axustada que está a clasificación”.
