O HC Borbolla volve a casa para recibir ao Cerdanyola CH e o fai buscando acadar o seu primeiro triunfo. O partido entre coruñesas e catalás está fixado para ás 12:00 de mañá, domingo 18/10/2020, no pavillón de Monte Alto. Hockey Global, un dos patrocinadores das galegas, transmitirá o partido na súa canle de YouTube.
As herculinas, máximas representantes galegas na OkLiga, buscarán con ansia o que sería o seu primeiro triunfo. As patinadoras que adestra Santi Martínez aínda non coñecen máis que o amargo sabor da derrota nesta a súa tempada de volta á elite do hoquei a patíns estatal.
Colleitaron xa tres partidos perdidos, dous como locais e un como visitante. Os seus resultado até o de agora foron 1-2 na primeira xornada co CP Alcorcón, 3-5 na segunda co Cuencas Mineras e 4-0 co Magic Studio CP Manlleu na terceira. Con todo, as coruñesas van medrando como grupo e mellorando o seu xogo xornada a xornada á procura dese triunfo que non remata de chegar.
Nas filas do HC Borbolla confía que este domingo ao mediodía sexa o momento no que se inicie o fin desa mala racha de resultados.
O seu rival, o Cerdanyola CH, empatou na primeria xornada na casa co Telecable HC (1-1), gañou na pista do Garatge Plana Girona CH (1-4) e volveu gañar como local fronte ao CP Las Rozas na pasada xornada (5-1).
Sobre o papel, sería un oso duro de roer. Agora mesmo está na zona alta da taboa, como o Magic Studio CP Manlleo, actuais campioas e último ‘verdugo’ das galegas.
