- O Guardés tivo un mal día na pista do penúltimo clasificado, o KH-7 BM Granollers.
- A gardameta internacional Nicole Wiggins amargou a tarde ao equipo que adestra Abel González.
O Mecalia Atlético Guardés sufriu un severo revés na súa visita ao KH-7 BM Granollers para comezar a primeira volta. Un mal partido do equipo miñoto traduciuse nunha derrota inapelable, que supón unha freada en seco á liña ascendente que a formación guardesa había iniciado a semana pasada coa súa sensacional vitoria en Málaga e o pase a cuartos de final da EHF European Cup de balonmán.
A clave do partido pasou pola escasa bagaxe goleadora do conxunto visitante e a extraordinaria actuación da porteira internacional Nicole Wiggins. A madrileña superou o 45% de efectividade para amargar a tarde a un Guardés que apenas puido transformar cinco goles na segunda metade do choque. Foi o que marcou as diferenzas, xa que o bloque miñoto ofreceu un bo rendemento defensivo, con Carratú roldando o 30%. Bos números.
Primeira vitoria como local do KH-7 BM Granollers
Pero no mar de imprecisións que foi o partido, o KH-7 BM Granollers saíu á boia. O equipo catalán, que non coñecía a vitoria como local aínda, estreouse co seu mellor partido do curso. Na primeira metade obtivo tres goles de renda (12-9) tras un envite disputado, no que Wiggins empezou a parar. María Sancha lideraba a resistencia cunha gran dirección de xogo e a súa habitual verticalidade.
Á volta dos vestiarios cabía pensar nunha reacción. Lamentablemente, non chegou. Durante moitos minutos, o marcador permaneceu inmóbil debido aos erros continuos de ambos os ataques e ao acerto das dúas porteiras. Deste xeito, tras 20 minutos, o Mecalia Atlético Guardés só transformada dous goles (17-11).
O partido escapábase e a pesar dun intento final, non houbo forma de corrixir o rumbo. A pesar da dura derrota, o triunfo do Sporting La Rioja fronte a Beti Onak permite ao conxunto que dirixe Abel González manterse na oitava posición, que lle permitiría eludir o play-out de permanencia a final de tempada.
FICHA TÉCNICA:
21) KH7 GRANOLLERS (12+9): Nicole Wiggins (p.), Ben Chayab (1), Alba Tort, Martina López, Ona Vila (2), Lea Kofler (4), Brasil (2), Ona Vegué (2), Marta Mera (p.), Ester Somaza (5), Paula Milagros (1), Ana González (1), Santos, Jana Castañera (1), Martina Capdevila (1) e Jallow.
14) MECALIA ATLÉTICO GUARDÉS (9+5): Marisol Carratú (p.); África Sempere (2), Sandra Santiago, Giselle Menéndez, Carolina Silva, Ángela Nieto, Pauli Fernández (2), Míriam Sempere (p.), Cris Cifuentes (2), Patrícia Lima (1), Celia López, Elena Amores (2), Carla Gómez (1), María Sancha (3) e Daniela Moreno (1).
MARCADORES CADA CINCO MINUTOS: 3-2, 6-4, 8-4, 8-5, 10-7, 12-9 (descanso); 13-10, 13-10, 14-11, 17-11, 19-13 e 21-14.
EQUIPO ARBITRAL: Jordi Pinilla e Eric Deiró. Excluíron con dous minutos ás locais Lea Kofler e Paula Milagros e á visitante Carla Gómez.
INCIDENCIAS: Partido da duodécima xornada, a primeira da segunda volta, da liga Guerreiras Iberdrola, disputado no Palau d’Esports de Granollers (Barcelona).
