O Atlético Mecalia Guardés acadou onte a súa primeira derrota coma local na presente edición da Liga Guerreras Iberdrola. Non o fixo ante un rival calquera, chegaba á Sangriña nada máis e nada menos que o Bera Bera, actual bicampión consecutivo do torneo doméstico e líder imbatible do mesmo.
As donostiarras que contan ata o día de hoxe todos os seus partidos por vitorias a excepción do empate que acadaron fronte ao Conservas Orbe Rubensa BM Porriño na quinta xornada de liga, souberon aproveitar un inicio errático do conxunto miñoto, e apenas superados os dous minutos de encontro xa impoñían a súa lei no marcador por unha diferencia de 0-3 que obrigou á escuadra de Prades a reaccionar para manterse viva no encontro.
As canguesas executaron todo un exercicio de fe e resistencia para non perderlle a cara ao partido, e deste xeito, lideradas pola extremo salcedense Lorena Pérez en ataque, e por unha notable mellora do bloque defensivo, encabezado unha vez máis pola gardaredes Miriam Sempere, comezaron a atopar fendas na ata o momento impenetrable zaga donostiarra que lles permitiron chegar ao tempo de descanso cunha desvantaxe de tan só dous tantos.
O Bera Bera aproveitou os erros do Guardés
Sen embargo, no inicio do segundo o Guardés volveu a conceder demasiadas facilidades de inicio a un Bera Bera que desta vez soubo aproveitar a falta de contundencia das locais para colocar o definitivo 26-33 que lles permite afianzarse aínda máis no primeiro posto da táboa clasificatoria.
Foi o dominio en ambas áreas o que propiciou que as visitantes puideran levar consigo os prezados dous puntos da Sangriña na tarde de onte. Mariane Fernandes, con 8 tantos, e a porteira Alice, tamén Fernandes, con 12 atalladas sostiveron ao equipo de Imanol Álvarez. O dúo carioca foi a punta de lanza e o escudo dun equipo que demostrou no serán de onte todo un exercicio de pragmatismo a través do seu xogo.
Chegou a primeira derrota ligueira nada casa ante un gran equipo. Toca erguerse e seguir loitando.
Forza, rapazas!🏆 @IberdrolaDHF
📆 Xornada 9
🤾🏻♀️ @Atlguardes_ofic 🆚 @BalonmaBeraBera
🔥 A Sangriña
⏱️ 60′
🔢 26-33
📷 @Coex_go #OnosoInfernoéonosoceo 🖤💛 pic.twitter.com/BvfhhflkUB— Mecalia Atlético Guardés (@Atlguardes_ofic) November 10, 2021
Cita europea
Esta fin de semana será quenda para a competición europea. O Atlético Mecalia Guardés viaxará mañá venres a Besançon, onde o sábado terá a oportunidade de redimirse desta derrota na ida da Q3 da Liga Europa fronte ó equipo alpino.
FICHA TÉCNICA
26) MECALIA ATLÉTICO GUARDÉS: Marisol Carratú (porteira), Míriam Sempere (porteira), Sandra Santiago (3), Nazaret Calzado (1), Lore Pérez (4), Descalzo (1), Lima (2), Paula Arcos (4), Carla Gómez (2), Sancha (4), Pessoa (4), Yaiza Alonso, Marian Mera e Daniela Moreno (1).
33) SUPER BERA BERA: Alice Fernandes (porteira), Esther Arrojería (3), Mariane Fernandes (8), Sara Gil, Emma Boada, Alba Menéndez (1), Oihane Bautista, Laura Hernández (5), Malena Cavo (6), Maitane Echeverria (4), Elisabet Cesareo (3), María Prieto, June Loidi, Cristina Polonio (2), Ainhoa Etxeberria e Mirene Moreno (1)
PARCIAIS CADA CINCO MINUTOS: 2-5, 5-7, 6-10, 9-12, 11-14, 14-16 – descanso- 15-19, 17-22, 21-24, 21-26, 23-26 e 26-33.
EQUIPO ARBITRAL: Jorge Escudero Santiuste e Jesús Escudero Santiuste, dos comités galego e aragonés respectivamente. Anotadoras / cronometradoras: Yolanda Vázquez Román e Víctor Manuel Rivera Diz.
INCIDENCIAS: Partido correspondente á novena xornada da Liga Guerreras Iberdrola disputado no Pavillón da Sangriña, na Guarda.
