O ano 2021 comezou de maneira accidentada para o Atlético Guardés. O equipo de balonmán contaba con disputar seis partidos en vinte días, pero varios aprazamentos fixéronlles cambiar de plans. No relativo á Liga Guerreras Iberdrola, o seu encontro ante o Super Amara Bera Bera deste sábado, 23 de xaneiro, ás 19:00 horas supoñerá o estreo das da Guarda na segunda volta.
“Seguimos recuperando a xente e iso é positivo”, di o adestrador das galegas, José Ignacio Prades. Para este duelo, terá a todas as xogadoras do Guardés á súa disposición, agás Mazza.
José Ignacio Prades: “Seguimos recuperando a xente e iso é positivo”
Este encontro será un prato forte para retomar a competición regular, xa que o rival das galegas é o actual líder do grupo A, que con 13 puntos en sete partidos, non tivo ningún contrincante que o superase.
Non puido co vixente campión de Liga o propio Guardés no partido de ida, cando perdeu por un resultado de 31-22 no campo das vascas. Esta foi a única derrota que sufriron as xogadoras de Prades este curso, algo que obviamente evitarán repetir nesta segunda volta do campionato de liga.
Remata o parón forzado debido a positivos
Ademais, tras os continuos adiamentos ou suspensións de partidos, as galegas chegan con enerxía e ganas de competir. A anterior xornada, que terían que ter xogado ante o Lanzarote Puerto del Carmen tivo que ser aprazada por un positivo entre as canarias.
A competición europea tamén quedou en stand by ao non poder competir a eliminatoria do Last 16 contra o Club Balonmano Elche, tamén por casos positivos nas filas rivais. Ante a imposibilidade de xogar a ida e a volta, o Guardés pasou directamente a cuartos sen xogar. Agora, a vista xa está posta no seguinte rival: o ucraíno HC Galychanka Lviv.
“Temos a incertidume de non saber como nos imos atopar”, explica o técnico sobre este tempo lonxe da pista. Pero as dúbidas non quitan a paixón polo balonmán, que lles fai chegar “con gañas de desfrutar e soltar a adrenalina”, sinalou Prades.
Tamén será o reencontro coa competición regular para as vascas, que levan sen xogala desde o 22 de novembro. O seu adestrador, Imanol Álvarez declarou que ten a “incógnita” sobre o estado do seu equipo, e comentou que “é un partido extrano e imaxino que o Guardés está na mesma situación”.
Duelo de goleadoras
Dúas xogadoras serán culpables do alto nivel de efectividade ante a meta contraria que se agarda ver na pista entre estes dous equipos nesta xornada da Liga Guerreras. Falamos de Paulina Pérez, do Guardés, e Adriana Cardoso, do Bera Bera.
A primeira é a máxima goleadora da categoría. Con 47 tantos nas súas botas, Paulina Pérez leva esta tempada unha media de 7,83 goles por partido. Algo por debaixo, na terceira posición, sitúase a súa opoñente nesta xornada, Adriana Cardoso. A xogadora do equipo vasco ten unha media de 4,86 tantos, con 34 goles acumulados este curso.
Ademais, é indiscutible que o gran rendemento de ambos conxuntos é obra de todo o plantel, o que as sitúan no máis alto da táboa do Grupo A. Xogadoras como Sandra Maqués e Paula Arcos tamén serán vitais no xogo local.
Varias baixas no rival do Guardés
As vascas do Super Amara Bera Bera presentan baixas para este enfrontamento. En concreto, o Bera Bera non poderá contar para este partido con O’Mullony. A xogadora mancouse nun adestramento e sufre unha luxación no ombreiro que a obriga a estar de baixa durante nada menos catro meses. Tampouco estará Boada, nin Eli Cesáreo. Ambas as dúas xogadoras atópanse agora mesmo nun proceso de recuperación de senllas lesións. Outra que será baixa na escuadra vasca é Sara Gil, no seu caso por molestias no cóbado.
Este duelo disputarase finalmente a porta pechada. O Atlético Guardés tiña a intención de xogar ante o seu público pero, atendendo á situación epidemiolóxica na pandemia de COVID-19 que se vive agora mesmo en Galicia e A Guarda, o club tomou a decisión de competir sen público nas bancada.
Porén, a afección si poderá seguir o encontro a través das canles autonómicas de televisión en aberto de Galicia e Euskadi: TVG e ETB.
