O dúo portugués formado por Sandra Santiago e Patrícia Lima cumprirá a súa terceira tempada no Atlético Guardés. As dúas xogadoras, que chegaron procedentes do Colegio Gaia no verán do 2019, seguirán defendendo as cores do club na Sangriña.
“Temos un proxecto moi forte e imos loitar por todo o que se nos poña por diante”, declara contundente Sandra Santiago. A lateral de Aveiro asegura que está “moi contenta por seguir un ano máis no Guardés e moi ilusionada por empezar a nova tempada”.
A súa compañeira, Patrícia Lima, coincide con ela, asegurando que “estou moi ilusionada co ano que vén porque creo que vai ser moi bonito. Temos un plantel súper completo”.
A central de Matosinhos engade que o Guardés “vai pelexar por todas as competicións”, algo que “me ilusiona un montón”.
Ambas as dúas recalcan que a volta da afección ao Inferno da Sangriña será moi especial. Santiago exclama “que ganas de volver xogar coa Sangriña chea!”, mentres que a súa compatriota afirma que “estou desexando volver xogar na Sangriña, diante da mellor afección de España”.
