Nas próximas semanas o Atlético Guardés ten varias citas programadas co Rincón Fertilidad Málaga. Galegas e andaluzas disputarán catro encontros entre Liga Guerreras Iberdrola e EHF European Cup, sendo o primeiro deles o correspondente á recuperación da sétima xornada ligueira. Este duelo celebrarase este mércores, 24 de febreiro, ás 20:45 horas.
Este partido preséntase como un encontro vital de cara á loita polo título da máxima categoría do balonmán español. En palabras do adestrador galego, José I. Prades, “é un reto enfrontarte a un dos mellores equipos da competición”. E non lle falta razón. As rivais das guardesas ven de facerse co título da Copa da Raíña o pasado mes de setembro e a Supercopa en decembro.
Un “reto maiúsculo” para o Guardés
Tal e como recalca o técnico, xogar contra un equipo desta embergadura “é un reto maiúsculo”, xa que son os favoritos en calquera competición. Porén, no Atlético Guardés prefiren ir partido a partido e fixar a súa vista no primeiro duelo. Gañar os puntos da vitoria ante o Rincón Fertilidad Málaga pode ser clave de cara a segunda fase competitiva e Prades insiste en que “queremos estar cos máximos posibles, xa que non hai volta atrás e os de Bera Bera xa non se poden conseguir”.
A falta de catro xornadas para concluir a primeira fase, o Atlético Guardés estará seguro entre os tres primeiros, pero ten a posibilidade de escalar á segunda posición. Todo depende dos resultados ante as andaluzas e dos partidos ante o San José Obrero e Lanzarote – Puerto del Carmen.
Pola súa banda, o Rincón Fertilidad Málaga chega de facer historia na competición europea logrando, como as de José Ignacio Prades, o pase a semifinais vencendo ao AC PAOK.
As de Suso Gallardo aínda non coñecen a vitoria en terras guardesas, polo que chegan a A Sangriña coa mente posta en afrontar un choque fundamental nas aspiracións polo título. Neste momento, o Atlético Guardés ocupa a segunda posición con 16 puntos e dez xornadas, mentres que as andaluzas son terceiras cun partido menos disputado.
O partido poderá seguirse vía streaming nesta ligazón.
Dúbidas na convocatoria
O apretado da axenda competitiva fai que Prades non teña unha convocatoria pechada ata última hora. Porén, sabe que Patricia Lima e Paula Arcos serán dúbida despois de non competir o domingo contra o Galychanka.
No equipo contrario, Gallardo viaxa con trece xogadoras cun plantel forte: as irmás López, Merche Castellanos, Silvia Arderiu, ou as ex do Guardés Estela Doiro, Sara Bravo ou Paula García.
Preludio europeo
O segundo dos encontros ante as andaluzas segue enmarcado na Liga Guerreiras, na xornada 14 o 6 de marzo. Pero seguirán véndose as caras na competición europea.
A fase de semifinal está programada para a fin de semana do 27-28 de marzo na ida e 3-4 de abril na volta. O primeiro destes duelos celebrarase en A Guarda e o segundo en Málaga.
