O plantel sénior do Club Balonmán Atlético Guardés participou esta semana nunha charla sobre Violencia de Xénero e Violencia Sexual organizada polo Centro de Información á Muller (CIM) do Concello da Guarda.
A actividade, na que tamén participaron deportistas doutros clubs femininos da vila galega, está financiada con cargo á asignación recibida do Ministerio de Igualdade, a través da Secretaría de Estado de Igualdade contra a violencia de xénero.
O club participou nesta charla dentro do compromiso da entidade de fomentar a igualdade de xénero a través do deporte, dar exemplo neste ámbito e exercer de maneira especial no deporte galego de embaixador da campaña da Secretaría Xeral de Igualdade dando difusión a contidos e materiais da campaña NON. Punto final á Violencia de Xénero.
O BM Atlético Guardés é un club activo en relación ás campañas promovidas desde a Fundación Deporte Galego.