O Atlético Guardés xa iniciou a súa última viaxe da tempada de Liga Guerreras Iberdrola para visitar ao KH-7 BM Granollers. O partido celebrarase o sábado, 15 de maio, ás 19:00 horas no Palau d’Esports.
Para o adestrador, José I. Prades, o obxectivo está claro: “É unha nova opción de manter a dinámica positiva”. As galegas levan unha segunda fase, na loita polo título, case impoluta. En seis xornadas, as do Baixo Miño só deixaron pasar un punto na súa visita a Carrús, cun empate ante o BM Elche.
O subcampionato, a un paso para o Guardés
A expedición, composta polas 17 xogadoras do plantel e o corpo técnico, xa está en terras catalás. Para rematar a preparación da cita, as do Baixo Miño adestrará na tarde do venres na pista anexa do Palau d’Esports, previa a unha sesión de activación e vídeo o propio sábado.
Se as xogadoras do Atlético Guardés repiten a vitoria obtida na primeira volta (24-23 na Sangriña), asegurarían o subcampionato ligueiro.
Actualmente, as xogadoras que adestra José Ignacio Prades suman 17 puntos, sendo o Rocasa Gran Canaria terceiro con 13 e un partido menos e o propio Granollers cuarto con 13 puntos.
Rival de nivel para as galegas
O técnico, Prades, agarda un partido difícil, “como todos os desta segunda fase”, unha complexidade agravada polo último resultado do Granollers, quen venceu ao Rincón Fertilidad Málaga, vixente campión da EHF European Cup, por un 26-31.
Para o adestrador visitante, o rival é “un dos equipos que mellor xoga en ataque, está moi elaborado e ten un selo moi persoal”.
O potente plantel do equipo catalán, con xogadoras como a pivote galega Carmen Prelchi, pon contra as cordas a miúdo ás galegas, que teñen sempre dificultades para vencer ao Granollers. Ao remate da primeira fase, as catalás foron líderes do grupo B, con só un empate e dúas derrotas.
De vencer no partido deste sábado, as xogadoras do Guardés chegarían con máis motivación e forza á competición copeira. As galegas disputarán o vindeiro venres o encontro de cuartos de final da Copa da Raíñacontra o Liberbank Gijón, nun partido previsto para as 18:30 horas no pavillón Rita Hernández.
