Sen tempo para descansar e repoñerse, o Atlético Guardés afronta no medio da semana un novo compromiso. As galegas enfrontaranse ao Aula Alimentos de Valladolid este xoves, 18 de febreiro, ás 19:00 horas.
Esta xornada de Liga Guerreras Iberdrola chega só uns días despois de que a expedición guardesa volvese de Leópolis, tras vencer ao ao HC Galychanka.
Pero a ilusión e paixón polo deporte poden co cansancio, xa que, tal e como recorda o adestrador Prades, “o que máis gusta é xogar, o de adestrar sen competir non é reconfortante”.
O propio técnico sinala que malia o apretado da axenda, no Atlético Guardés están a desfrutar “dunha fase moi boa e para a cal o plantel se estivo preparando entre decembro e xaneiro”. Pero a emoción das competicións non nubla a vista para o que as espera. “Hai que xestionar o cansancio e esperar que as xogadoras se vaian recuperando de golpes”, apunta Prades.
O adestrador aínda non puido pechar a convocatoria, á espera de ver como evolucionan xogadoras como Sandra Santiago, que sufriu unha escordadura no partido de Ucraína.
Esta duodécima xornada que enfronta a galegas e vallisoletanas xogarase en Huerta del Rey. O rival do Guardés acaba de rematar o seu periodo de corentena, polo que aínda hai dúbidas sobre a celebración deste encontro.
Debido a estes casos de COVID-19, o Aula Alimentos leva dúas semanas sen competir, o que pode afectar ao seu rendemento. Ademais deste hándicap, o equipo de Peñas terá que disputar seis partidos en 18 días.
A axenda do Guardés
O Guardés pasa este mércores o test de antíxenos, obrigatorio xa na Liga Guerreiras, e viaxará a Valladolid este xoves, volvendo a Galicia no mesmo día.
O venres o plantel terá día libre e volverá aos adestramentos o sábado pola tarde e o domingo pola mañá para preparar o duelo desde mesmo día contra o HC Galychanka (ás 19:00 horas).
