O Guardés faise co derbi galego ante o Porriño (32-22)

A Liga Guerreras Iberdrola deixounos na fin de semana a oportunidade de desfrutar do derbi galego entre o Atlético Guardés e o Conservas Orbe Porriño, nun encontro dominado na primeira parte polas do Baixo Miño e con vitoria local (32-22).

Neste duelo entre as pupilas de José I. Prades e as de Isma Martínez, as primeiras levaron o mando do partido nos primeiros minutos, logrando así unha vantaxe que lles daría o triunfo na Sangriña malia a melloría das visitantes.

Dominio local no inferno da Sangriña

Desde os primeiros compases do partido o Atlético Guardés de Prades controlou o ritmo, cun plantel concentrado no seu xogo e con ganas de desfacerse da espiña cravada na Supercopa de Galicia. No reencontro do equipo coa súa afección as xogadoras do Baixo Miño anotaban xa o 4-1 pasados só catro minutos de xogo.

Entón, Isma Martínez viuse obrigado a solicitar un tempo morto, pero nada cambiou tras a pausa. As locais continuaban a ser superiores, malia os esforzos de Mica Casasola nas filas porriñesas. Porén, Carratú sacoulle dous lanzamentos de sete metros e outro máis aló dos nove para tomar vantaxe no cara a cara arxentino.

Cunha defensa 6:0, as do Guardés mantiñan a súa superioridade. En ataque, unha acertada Paula Arcos lideraba as ofensivas locais aproveitando os erros visitantes. Xunto a ela, Pessoa pola esquerda, Lima coa dirección e Lore Pérez e Moreno desde os extremos e Carla Gómez na liña non se quedaban atrás.

No banco visitante, Martínez animaba ás súas pupilas incidindo en que fosen “paso a paso”, centrándose no encontro e non no marcador.

Esta primeira parte perfecta para o Guardés consumouse co gran entendemento das de Prades na defensa, facendo que o Porriño só puidera anotar sete tantos antes do descanso, con dous goles antes da bociuna de Maider Barrios. Cunha primeira metade moi desigual, as locais vencían 20-7 para o tempo de pausa.

Tras o paso por vestiarios o Guardés baixou unha marcha, feito que aproveitaron as xogadoras visitantes para recortar distancias e ameazar ás guardesas. Cun parcial 2-5 e unha defensa 6:0, o Porriño avisaba das súas intencións, pero aínda tiña camiño que percorrer para a remontada. A vantaxe obtida polas de Prades non chegou a baixar nunca dos sete goles, grazas ao acerto de Carratú primeiro e Sempere despois baixo paus.

Nos últimos minutos, a xuvenil Yaiza Alonso debutou coa camiseta do Atlético Guardés festexando xunto á bancada a vitoria no derbi galego. O balance negativo do duelo galego foi a retirada de Aitana Santomé tras chocar con Paula Arcos.

Cun 32-22 final, os dous puntos do derbi quedaron na Sangriña, o que supón a segunda vitoria para o Atlético Guardés neste inicio da Liga Guerreras Iberdrola.

FICHA TÉCNICA

Club Bm Mecalia Atlético Guardés (32): Sandra Santiago (6), Nazaret Calzado (2), Lorena Pérez (2), Tamires Anselmo, Ángela Nieto, Estefanía Descalzo, Deborah Nunes, Patricia Lima (3), Paula Arcos (5), Carla Gómez (3), María Sancha (1), Gabriela Pessoa (3), Daniela Moreno (7), Yaiza Alonso, Marisol Carratú e Miriam Sempere.

22 – Conservas Orbe Rubensa Bm Porriño: Carolina Bono, Micaela Casasola (8), Alicia Campo, Érica Tavares, Aitana Santomé (3), Arima López, Claudia Kaulback (1), Anthia Espiñeira (2), Maider Barros (1), Sarai Samartín, Haridian Rodríguez (3), Sandra Fernández, Thais Fermo (3), Carme Castro (1), Estela Carrera e Fátima Ayelén.

Marcador cada 5 minutos: 5-2, 9-4, 13-5, 16-5, 18-5, 20-7, -descanso-, 21-10, 23-13, 24-16, 27-18, 31-20, 32-22.

Árbitros: José Carlos Friera e Jesús Álvarez. Por parte do Conservas Orbe Rubensa Bm Porriño excluíron a Sarai Samartín e Thais Fermo. No Club Bm Mecalia Atlético Guardés excluíron a Patricia Lima e Gabriela Pessoa.

Incidencias: Partido correspondente á segunda xornada da Liga Guerreras Iberdrola disputado con público na Sangriña.