O Mecalia Atlético Guardés comezou do mellor xeito a súa andaina no campionato doméstico neste novo ano grazas á solvente vitoria acadada fronte ao conxunto levantino do Morvedre. O triunfo, máis alá dos dous puntos, supón un ilusionante inicio de 2022 para o conxunto miñoto, que recupera deste xeito o partido da sexta xornada, adiado pola súa participación en competición europea.
O conxunto dirixido por José Ignacio Prades volveu protagonizar un inicio de encontro con dúbidas, no que o equipo da comunidade valenciana, moito máis metido no partido, estableceu un parcial inaugural de 1-4. A febleza do engranaxe defensivo non era nin moito menos a habitual no conxunto miñoto, polo que o adestrador de Petrer tivo que facer unha serie de axuntes na zaga para tratar de darlle a volta á situación
A tarefa non sería nin moito menos sinxela. O BM Morvedre demostrou moito máis do que demostra a súa undécima posición na táboa clasificatoria, e baixo a dirección de Celia López e os cinco goles de Helena Martín seguiu a complicar a remontada local.
Os extremos foron claves para darlle a volta ao electrónico
As melloras defensivas, xeradas principalmente a partir da redución das perdas, propiaciaron que o Guardés fose entrando de novo na desputa polos puntos. O papel das extremos, que finalizaron á perfección as accións ofensivas dirixidas por Patrícia Lima, foi clave, especialmente aportación de Daniela Morena, con cinco tantos e Ángela Nieto, máxima anotadora do choque con seis goles.
A bejarana tivo unha alta participación debido á baixa de última hora de Lorena Pérez, que non puido xogar por un golpe no xeonllo no último adestramento da semana. A doenza, que non reviste maior gravidade, imposibilitou que a de Salceda formase parte da lista para previr males maiores.
As modificacións permitiron que equipo miñoto fose quen de reducir distancias e irse ao tempo de descanso cun igualado 13-13 no marcador. O paso polos vestiarios serviulle a Prades para matizar conceptos de cara a aumentar as prestacións defensivas na segunda metade. E grazas a isto, o Guardés puido establecer un parcial de 7-2 en dez minutos que poñía ás da Guarda na rampla de despegamento cara o triunfo.
No resto do encontro, o equipo local soubo contemporizar e José Ignacio Prades rotou todo o que o seu plantel lle permitiu, incluíndo a presenza da xuvenil Aroa Fernández en pista. A falta de ritmo motivada polo parón de máis dun mes fíxose partente, pero os dous puntos nunca chegaron a perigar. O Guardés garantiuse a vitoria e recuperou o choque aprazado da sexta xornada do mellor xeito posible.
🤩 Final! 30-21. A primeira do 2022 queda na casa. Dous puntiños para seguir medrando.
📷 @Coex_go#onosoInfernoéonosoceo 🖤💛 pic.twitter.com/T7pAz533FM— Mecalia Atlético Guardés (@Atlguardes_ofic) January 8, 2022
O Guardés afronta un completo mes de xaneiro
A vindeira cita do Mecalia Atlético Guardés no campionato doméstico será o vindeiro sábado, 15 de xaneiro, cando reciba ao Sant Quirze na Sangriña ás 20:00 horas. Tras este encontro, as xogadoras dirixidas por Prades deberán facer as maletas para enfrontarse ao Costa del Sol Málaga en terras andaluzas na duodécima xornada da Liga Guerreras Iberdrola, antes de pechar o mes fronte ao BM Bolaños na Copa da Raíña.
FICHA TÉCNICA
30) MECALIA ATLÉTICO GUARDÉS: Carratú (p.), Míriam Sempere (p.), Márian Mera (p.); Sandra Santiago (3), Nazaret Calzado (4), Ángela Nieto (6), Estefanía Descalzo, Patrícia Lima (3), Paula Arcos (4), Carla Gómez (3), María Sancha (1), Gabriela Pessoa (1), Daniela Moreno (5) e Aroa Fernández.
21) BM MORVEDRE: Sonora Solano (p.), Patri Encinas (p.); Malena Guerisoli, Mariángeles de Uriarte (3), Irene Botella, Fiorella Corimberto (2), Celia López (3), Matilde Tisató, Lucía Gámez (4), Naiara Rubira 81), Helena Martín (5) e Andrea Roda (3).
MARCADOR CADA 5 MINUTOS: 2-4, 5-7, 9-8, 12-10, 12-11, 13-13 – descanso – 16-13, 19-14, 22-16, 25-19, 28-20 e 30-21.
ÁRBITROS: Abel Juncal e Ángel Mateos (Galicia). Excluíron dous minutos ás xogadoras locais Patrícia Lima, Carla Gómez e María Sancha e ás visitantes Celia López (2), Lucía Gámez e Helena Martín.
INCIDENCIAS: Partido desputado no Pavillón de A Sangriña correspondente á sexta xornada da Liga Guerreras Iberdrola, aplazado no seu día pola desputa de la Liga Europea por parte do Mecalia Atético Guardés.
