O Mecalia Atlético Guardés sumou no serán do mércores un punto de moito prestixio no pavillón Insular Antonio Moreno fronte a un dos equipos de maior entidade da Liga Guerreras Iberdrola.
As xogadoras adestradas por José Ignacio Prades chegaban a Telde para afrontar o seu terceiro encontro en apenas sete días tras recibir na Sangriña ao Bera Bera e desprazarse ata os Alpes franceses para facer fronte ao Beçanson galo na Q3. A derrota acadada en ambos os dous partidos demandaba unha actuación convincente coa que a escadra vermella puidese recuperar sensacións e confianza, e así o fixo, a base de fe, e sobre todo, de moito balonmán.
Dende o inicio do encontro os dous equipos deixaron de manifesto as súas intencións ofensivas protagonizando un auténtico tiroteo no que o Rocasa Gran Canaria deixou patente o poderío do seu arsenal atacante e o Guardés fixo gala dun xogo moito máis coral e participativo no que o papel das extremos foi clave para debilitar á sólida zaga das canarias.
O encontro chegou ao tempo de descanso cun sorprendente 19-18 a prol das locais, e á volta de vestiarios a disputa mantivo o mesmo guión cun Rocasa demoledor arriba grazas ao bo facer das laterais Mbengue e Gomes, con 12 e 8 dianas respectivamente. Deste xeito foron, as grancanarias foron incrementando a súa vantaxe no electrónico ata poñerse dous tantos arriba nos derradeiros minutos de encontro.
Pola súa parte, o conxunto miñoto sostívose no encontro grazas ao acerto da gardameta Marisol Carratú e á precisión en área rival de Gabriela Pessoa e Carla Gómez. A recentemente convocada pola Selección Española para o Campionato do Mundo, Paula Arcos, malia destacar na primeira parte, baixou as súas prestacións durante case todo o segundo parcial por mor do intenso entramado defensivo que lle impuxeron as xogadoras de Robert Cuesta. Con todo, nos derradeiros minutos de encontro demostrou porque estará presente coas ‘Guerreras’ na cita mundialista. A deportista liderou ao conxunto miñoto á remontada cunha actuación antolóxica que lle serviu ao equipo de José Ignacio Prades para empatar a contenda e cargarse de moral para a vital cita europea.
Final! Un punto moi traballado nun final de infarto!
🏆 @IberdrolaDHF
📆 Xornada 10
🤾♀️ @BMRemudas 🆚 @Atlguardes_ofic
🏟️ Pabellón Antonio Romero
📍 Telde (Gran Canaria)
⏱️ 60′
🔢 34-34📷 @BMRemudas#onosoInfernoéonosoceo 🖤💛 pic.twitter.com/DX0GPA7EF5
— Mecalia Atlético Guardés (@Atlguardes_ofic) November 17, 2021
O seguinte reto do Guardés, Europa
Deste xeito, o Mecalia Atlético Guardés pon punto e final ao ano 2021 no campionato doméstico antes de tratar de culminar unha remontada historica o domingo ás 19:00 horas fronte ao Besançon nunha Sangriña que deberá xustificar máis que nunca o seu alcume de inferno e levar en brazos ao seu equipo á seguinte rolda da Liga de Campións da EHF feminina.
Que fai falla para unha remontada?
🤾♀️ Balonmán
🖤 Corazón 💛
🔥 InfernoNós poñemos o balonmán.
Vós poñedes o Inferno.
Xuntos poñemos o corazón.Agardámosvos o domingo na Sangriña.#CorazóneInferno 🖤💛🔥🤾♀️#InfernoEuropeo 🇪🇺 pic.twitter.com/RWDqTkLlYb
— Mecalia Atlético Guardés (@Atlguardes_ofic) November 18, 2021
FICHA TÉCNICA
34) Rocasa Gran Canaria: Silvia Navarro (p.), Ana Palomino (p.); Falcón (1), De Miguel, Arinegua (2), Gkatziou (4), Quevedo, Zygoura (1), Spugnini (5), Mbengue (12), Gomes (9), María González, Nerea Guerra, Mizuki y Pavlovic.
34) Mecalia Atlético Guardés: Carratú (p.), Míriam Sempere (p.); Sandra Santiago (3), Nazaret Calzado (3), Lore Pérez (1), Lima (4), Arcos (3), Carla Gómez (6), Sancha (2), Pessoa (8) e Daniela Moreno (3).
Parciais cada cinco minutos: 3-1, 6-3, 8-8, 13-11, 15-13, 19-17- descanso – 23-21, 27-25, 30-29, 31-30, 33-31 e 34-34.
Árbitros: Roberto Carlos Mendoza e Juan Pablo Visciarelli (Colegio andaluz). Excluíron dous minutos ás xogadoras locais María González, Gomes e Mbengue, e ás visitantes Patrícia Lima (2), Nazaret Calzado e Carla Gómez.
Incidencias: Partido correspondente á décima xornada da Liga Guerreras Iberdrola disputado no Pabellón Insular Antonio Moreno, situado na localidade grancanaria de Telde.
