O Mecalia Atlético Guardés e o Saeplast Cañiza asinan un acordo de filialidade, de maneira que o club do Baixo Miño será o patrocinador e o da Paradanta o filial.
Os presidentes dos dous clubs, Jesús López e Rubén Fernández, e os seus secretarios Julio Capón e Marcos Estévez confirmaron o convenio sellando un documento vinculante durante unha tempada, a do curso 2021/2022. O acordo é prorrogable anualmente se o aproban as Asembleas das entidades.
O pacto afecta só aos primeiros equipos dos dous clubs, ao de División de Honor no caso do Guardés e o de Prata no caso do Cañiza. Desta forma, José I. Prades poderá dispoñer de calquera xogadora sub23 do equipo cañicense para calquera partido. Da mesma forma, o Guardés poderá ceder a xogadoras que considere pola circunstancia que sexa e nun periodo de tempo indefinido, con posibilidade de revocalo en calquera momento.
A través deste acordo, o equipo da Guarda poderá acceder ao talento da Cañiza, e colaborar para que o conxunto da Paradanta poida afianzarse na segunda división española, á que acaba de ascender.
