Para asegurar o seu pase á fase final da Copa da Raíña, o Atlético Guardés deberá remontar tres goles. No seu partido da ida da segunda fase, ante o Zubileta Evolution BM Zuazo, as galegas caeron por un 27-24.
Os esforzos da primeira metade, que deixaba o encontro nun empate ao descanso, foron insuficientes na segunda parte. O equipo dirixido por Prades sumou doce minutos sen anotar, o que lle valeu a derrota final.
Un pulso na primeira parte
O duelo comezou cun man a man entre vascas e galegas, cun ritmo frenético cheo de ataques rápidos e cos puntos subindo como a escuma para ambos conxuntos.
O avance de tantos só tivo unha interrupción nun lanzamento de sete metros marrado por bando, polo cal Buforn chocou contra o pao da portería local e Sempere saltou á pista para defender á visitante.
A activa dinámica do partido cambiou coa defensa do Atlético Guardés. O equipo de Prades subiu o nivel e Erika Rajnohova afinou no seu ataque. A central eslovaca demostra o seu talento co acerto na dirección e no lanzamento, e as galegas seguiron o seu ritmo.
As ofensivas visitantes aumentaron coa entrada de Sandra Santiago desde o banco, cun parcial 0-3 que lles daba a vantaxe momentánea. Pero co vaivén de ocasións e transformacións, o Zuazo devolveulle o ataque ás galegas cun parcial 6-0 tras un tempo morto. Finalmente, as vascas igualaban ao Guardés xusto antes do descanso (15-15).
Bloqueo do Guardés na segunda
Tras o paso por vestiarios Prades moveu ás súas xogadoras, cambiando a Sempere por Carratú baixo paos e con Patricia Lima para compartir a dirección ofensiva con Rajnohova.
Os primeiros minutos facían presaxiar un resultado favorable para o Guardés. Cun tanto de Buforn desde os sete metros e a exclusión de Alba Sánchez, as visitantes poñíanse no 16-18.
Víndose por debaixo, o equipo vasco reaccionou con forza e cunha melloría defensiva con Aallà destacando na portería. Un parcial 5-0 ao seu favor tumbaba ás do Baixo Miño. Prades viuse obrigado a perdir un tempo morto, pero o seu plantel acumulou ata doce minutos sen anotar.
Arcos foi a responsable de romper esta mala racha, cun lanzamento que culminou unha boa circulación en superioridade pola exclusión de Bengoetxea.
Porén, xa era tarde. As galegas perderan o ritmo e xa non tiñan continuidade en ataque, sendo sempre freadas por unha Aallà incomensurable. A ausencia de Sarah Valero por un choque e o acerto do Zuazo en ataque poñía en perigo ás visitantes.
Grazas a Arcos, que foi a máxima anotadora do Guardés, as de Prades mantiñan as súas opcións, pero sen chegar a materializalas. Cun tanto de Urban as locais estaban a un gol de distancia a dous minutos do final. Con todo, este sería o último tanto das galegas, que perderon por tres tantos ante o Zuazo.
O partido de volta, que se celebrará en A Sangriña, aínda non ten data. A ida tivo que modificar a súa data orixinal debido a un brote de COVID-19 no conxunto vasco, e a posibilidade de xogalo na mesma fin de semana non se levou a cabo polas convocatorias internacionais en ambos bandos.
FICHA TÉCNICA
27) ZUBILETA EVOLUTION BM ZUAZO (15+12): Aallà; Erauskin (4), Magdalena Fernández-Agustí (4), Alba Sánchez (7), Loidi (3), Velasco (1) e Ainhoa Hernández (1) -sete inicial-. Tamén xogaron: Isabel Fernández-Agustí, Maider Barrios, Arozamena, Encina (1), Puigbò (3), Bengoetxea (3), Blázquez, Romero e Ariadna González (p.s.).
24) CLUB BALONMÁN ATLÉTICO GUARDÉS (15+9): Carratú; Urban (3), Buforn (2), Descalzo, Sarah Valero (2), Paula Arcos (6) e Lore Pérez (2) -sete inicial-. Tamén xogaron: África Sempere, Sandra Santiago (4), Lima, Barbosa, Gómez, Rajnohova (5), Morais e Míriam Sempere (p.s.).
RESULTADO CADA 5 MINUTOS: 3-3, 4-6, 7-8, 11-11, 12-14, 15-15 –descanso- 16-17, 18-18, 21-18, 21-20, 23-21 e 27-24.
ÁRBITROS: Jorge Monjo e Óscar Gutiérrez (Madrid). Exclusións: Descalzo e Lore Pérez no Atlético Guardés e Alba Sánchez (2), Loidi e Bengoetxea no Zuazo.
INCIDENCIAS: Partido correspondente á ida da segunda fase da Copa da Raíña disputada en Lasesarre (Barakaldo).
