O Mecalia Atlético Guardés deu a cara pero finalmente non foi quen de voltar de San Sebastián con nada positivo en canto a puntos.
O Super Amara Bera Bera superou ás xogadoras de negro e amarelo amparándose nun parcial de 6-0 mediado o primeiro ecuador que permitiu ás locais tomar unha cómoda renda no marcador. Dez minutos exactos sen marcar estiveron as xogadoras adestradas por José Ignacio Prades, ás que non lles quedou outra que ir a remolque durante toda a segunda metade.
O Guardés viuse anulado pola zaga local
Logo dun bo inicio, aguantando o tipo ante o líder nun intercambio de golpes que se traduciu nunha sucesión constante de goles ata o 5-5, algo pouco habitual en dous equipos que basean a súa fortaleza na fase defensiva, o Guardés comezou a ceder terreo ante a forte defensa local e a deixarse ir no rumbo do encontro.
Ao longo de dez minutos, o colectivo miñoto non viu portería. Unhas veces Alice Fernandes, outras a defensa donostiarra e outras as imprecisións visitantes deixaron a cero ao Guardés durante un lapso no que o Bera Bera anotou seis goles. Un parcial de 6-0 que marcou a diferenza.
Porque, a partir dese momento, a igualdade regresou. De novo houbo intercambio de golpes con Malena Cavo martillando para o conxunto azul e as de negro e amarelo repartíndose a responsabilidade goleadora. Tamén cun bonito duelo nos lanzamentos de sete metros entre Laura Hernández e Patrícia Lima.
Pero a renda de media ducia de goles mantíñase inalterable. E así se chegou ao tempo de descanso cun contundente 17-11 a prol das locais.
Á volta de vestiarios, o decorado apenas cambiou. Sandra Santiago compareceu na pista para tentar comandar a remontada. A lateral internacional portuguesa puxo o seu gran lanzamento ao servizo do equipo e acumulou varios goles consecutivos ata irse a cinco. O problema é que Bera Bera respondía na outra portería. A diferenza non minguaba.
A Copa, a meta tras o parón internacional
Froito desa impotencia, o conxunto miñoto baixou un pouco o ritmo. De súpeto, non atopaba vías de auga no 6:0 azul. Así, a vantaxe foise incrementando aos poucos ata chegar a ser de dez goles. Un tanto de Ángela Nieto sobre a bucina deixouna finalmente en nove (33-24) pero certificou igualmente a derrota da escuadra visitante. O Guardés acaba quinto a xornada, con todas as opcións de seguir pelexando polos postos de acceso a competición europea intactos.
Agora toca recuperar as forzas durante o parón de seleccións da semana que vén para regresar a San Sebastián dentro de dúas, desta quenda, para disputar a Copa da Raíña coas esperanzas de voltar levantar un trofeo desde que se proclamaran gañadoras da Liga Guerreras Iberdrola hai cinco anos, no 2017.
Final. Non puido ser. Agora toca recuperar forzas para voltar a Donosti a dalo todo na Copa.
🏆 @IberdrolaDHF
📆 Xornada 22
🤾♀️ @BalonmaBeraBera 🆚 @Atlguardes_ofic
🏟️ Josean Gasca
🚌 Donosti
⏱️ 60′
🔢 33-24
#onosoInfernoéonosoceo 🖤💛 pic.twitter.com/dYhCz1HkAM— Mecalia Atlético Guardés (@Atlguardes_ofic) April 16, 2022
FICHA TÉCNICA
33) SUPER AMARA BERA BERA: Alice Fernandes (p.), Maddi Aalla (p.); Arrojeria (4), Fernandes (3), Sara Gil, Alba Menéndez, Emma Boada (3), Laura Hernández (7), Malena Cavo (5), Maitane Etxeberria (4), Eli Cesáreo (2), O’Mullony (1), Loidi (2), Cristina Polonio (1) e Ainhoa Etxeberria (1).
24) MECALIA ATLÉTICO GUARDÉS: Marisol Carratú (p.), Míriam Sempere (p.); Sandra Santiago (5), Nazaret Calzado (2), Carolina Silva (2), Lorena Pérez (1), Ángela Nieto (1), Estefanía Descalzo (2), Patrícia Lima (3), Paula Arcos (3), Carla Gómez (2), María Sancha (1), Gabriela Pessoa (4) e Daniela Moreno (2).
PARCIAIS CADA CINCO MINUTOS: 4-3, 6-5, 10-5, 12-7, 15-9, 17-11 (descanso); 19-13, 22-15, 25-18, 28-19, 30-21 e 33-24 (final).
EQUIPO ARBITRAL: Alejandro Hoz e Álex Riolba, anotadora Susana González. Excluíron dous minutos ás xogadoras locais Alba Menéndez e Cristina Polonio e á visitante Carolina Silva.
INCIDENCIAS: Partido da Liga Guerreras Iberdrola disputado no pavillón José Antonio Gasca da localidade de Donostia.
