Cambio de cromos no Mecalia Atlético Guardés. O conxunto miñoto fixo oficial esta mañá a incorporación de Carolina Silva logo de anunciar días atrás a rescisión de mutuo acordo do contrato da pivote carioca Tamires Anselmo.
Con este movemento, José Ignacio Prades vé reforzada o seu curto plantel cunha xogadora que aos seus 24 anos xa acumula unha ampla experiencia sendo internacional absoluta coa selección lusa.
Silva, un salto de calidade para a zaga do Baixo Miño
En torno ás 15:00 horas desta tarde o Mecalia Atlético Guardés oficializaba a través das súas redes sociais a incorporación da defensora procedente do Alavarium da Primeira División Portuguesa, cumplindo así un anhelo da parroquia guardesa que acolle con optimismo este reforzo de cara a segunda metade do curso.
🚨 FICHAXE
🇵🇹 Temos menina nova na oficina!
➡️Carolina Silva
➡️24 anos
➡️Primeira liña
➡️1,76 metros.
➡️Internacional 🇵🇹
➡️Procede do Alavarium de Aveiro
➡️Polivalente e gran defensora.🤗Bem vinda, Carolina!#onosoInfernoéonosoceo🖤💛 pic.twitter.com/ou5HgZZL1t
— Mecalia Atlético Guardés (@Atlguardes_ofic) January 20, 2022
A nova fichaxe, Carolina Silva, destaca por riba de todo pola súa formidable polivalencia, que a fai capaz de actuar en calquera das tres posicións da primeira liña, motivo polo que a tan curta idade xa acumula nove internacionalidades coa selección absoluta do seu país, onde coincidiu coas súas novas compañeiras de equipo, Patricia Lima e Sandra Santiago, ademais, foi internacional en todas as categorías inferiores do combinado nacional luso.
Entre as súas virtudes compre resaltar a gran capacidade defensiva sustentada nos seus bos conceptos en todas as facetas do xogo, sendo tamén unha xogadora incisiva na parcela ofensiva.
A zagueira, que xa acumula varios adestramentos co equipo, pasou esta mañá o recoñecemento médico e formará parte da expedición que viaxará a Málaga para medirse ao Costa del Sol este sábado. O seu debut dependerá de que a Real Federación Española aprobe a súa inscrición nas vindeiras horas, e de non ser así, os seus primeiros minutos terán que agardar ata o encontro copeiro do próximo mércores ante o Bolaños.
Silva: “Quero axudar ao equipo para alcanzar os obxectivos marcados”
Logo duns días na Guarda, nos que puido presenciar na Sangriña a vitoria do seu novo equipo e coñecer e adestrarse coas súas novas compañeiras, a defensora lusa buscará retomar o ritmo competitivo para paulatinamente poder entrar no esquema de rotación do conxunto miñoto.
Carolina Silva sobre a súa chegada ao Mecalia Atlético Guardés: “Hai xa algún tempo que aspiraba a xogar nunha liga máis competitiva que a portuguesa e o feito de poder adestrar cunhas xogadoras con tanta experiencia e obxectivos tan ambiciosos é realmente gratificante para min”.
O seu novo adestrador, José Ignacio Prades, tamén se mostrou satisfeito pola súa incorporación, destacando a polivalencia e as gañas da que desde agora é a súa nova xogadora.
Prades sobre a fichaxe de Carolina Silva: ”É unha xogadora nova, que vén con moitísimas ganas e moita ilusión, pode xogar en varios sitios na primeira liña e, sobre todo, é unha boa defensora”.
Tamires Anselmo abandona o Guardés sen debutar
O Mecalia Atlético Guardés tamén anunciou esta semana o acordo bilateral para a rescisión do contrato da pivote brasileira Tamires Anselmo.
Anselmo, quen chegara fai tan só seis meses ao conxunto miñoto, regresa ao seu país logo de non poder debutar en encontro oficial co Guardés por mor dunha lesión de xeonllo producida por unha doenza na cadeira.
O club quixo expresar o seu agradecemento polo tempo que compartiron xuntos e desexarlle sorte no seu futuro.
O Mecalia Atlético Guardés e Tamires Anselmo chegaron a un acordo para rescindir o contrato da xogadora brasileira.
Moita sorte no futuro, @TamiAnselmo11 pic.twitter.com/NHFM1uCnVW
— Mecalia Atlético Guardés (@Atlguardes_ofic) January 16, 2022
