A edición do 2021 do GP Cantóns, organizado pola Federación Galega de Atletismo e o Concello da Coruña foi un éxito para o ente federativo. A organización destaca como, malia as dificultades propias dun evento deste tipo en tempos de pandemia, a proba desenvolveuse positivamente.
Na proba feminina a primeira atleta en chegar á meta foi Sandra Lorena Arenas, marchadora colombiana que se proclamou así campioa da prestixiosa proba coruñesa. A primeira galega en cruzar a liña de meta foi Carmen Escariz.
Sandra Lorena Arenas, vence no GP Internacional de Marcha Cantóns da Coruña – Trofeo Sergio Vázquez
Éxito deportivo do GP Cantóns
Segundo informa a FGA, o GP Cantóns foi un éxito deportivo, xa que ata dezaseis atletas baixaron dos rexistros das marcas mínimas impostas pola World Athletics para formar parte dos Xogos Olímpicos de Toquio, sendo este 1:31 minutos nas probas femininas.
Ademais, dous campións olímpicos masculinos, o italiano Maurizio Damilano e o mexicano Raúl González, destacaron o alto nivel deportivo da proba e da organización. A competición tamén serviu para ver a novas figuras emerxentes na marcha internacional. A gañadora da categoría feminina do GP Cantóns, a colombiana Sandra Lorena, fixo un rexistro de 1.28:24, engadindo este éxito ao obtido nos Xogos Panamericanos do 2019, cando foi campioa, e os mundiais de Doha, cando foi quinta.
O podio completouse coa mexicana Alegna González, cunha marca de 1.28:40 e en terceiro lugar quedou a brasileira Erika Rocha, a só vinte segundos da gañadora da proba, no que foi o seu terceiro podio desde o 2015.
Nos homes o campión foi o hispano Diego García, subcampión europeo, logrando un rexistro de 1.19:37. En segundo lugar quedou o sueco Perseus Karlstrom e en terceiro o tamén español Álvaro Martín.
No ámbito do atletismo galego, Carmen Escariz foi a mellor posicionada, logrando un rexistro de 1.39:36, a súa MMP. Pola súa parte, Antía Chamosa foi descualificada na metade da carreira polo que tivo que abandoar a competición. O seu irmán, Daniel Chamosa, acadou o posto 34º mellorando a súa MMP.
Durante a celebración da proba, Concello e Federación entregaron ao irmán de Jordi Llopar, Moisés, unha placa en recoñecemento e admiración a súa importantísima traxectoria atlética e divulgativa desta modalidade.
Éxito sanitario
No aspecto sanitario, a pandemia de COVID-19 non foi un impedimento para a celebración do GP Cantóns. Esta foi unha das primeiras competicións internacionais celebradas en Galicia desde o inicio da pandemia, e malia que a incerteza da chegada de atletas á Coruña mantívose ata os últimos momentos, non houbo que lamentar moitas faltas. Un colectivo de atletas brasileiros e o medallista do mundial de Doha, o ruso Vasily Mizinov, non puideron porén viaxar a Galicia.
Na cidade, a proba foi seguida por gran cantidade de público no mesmo circuíto dos Cantóns, pero en ningún momento houbo perigo de contaxio debido ao excelente comportamento do público presente. Ademais, a competición retransmitiuse vía streaming con preto de 2.000 seguidores no momento no que Diego García acadou o seu primeiro triunfo na Coruña. Ás poucas horas, a cifra ascendeu ás 17.000 visualizacións.
Segundo apunta a FGA, a presenza de máis de 30 países entre atletas e xuíces árbitros, obrigaron a extremar as medidas de seguridade. Na mesma mañá do sábado realizáronse tests de antíxenos a todos os participantes, sen que se localizara ningún resultado positivo.
Tanto o Concello da Coruña como a Federación Galega de Atletismo valoran positivamente esta nova edición do GP Cantóns, en especial polas difíciles condicións no entorno da COVID-19. Nos vindeiros días está prevista unha xuntanza para analizar todo o proceso organizativo e extraer conclusións para aportar melloras para o 2022.
