O 50% da última convocatoria da Selección Española de fútbol sala provén do futsal galego. Ademais das catro xogadoras galegas convocadas, outras tres futbolistas compiten en terras galegas, e tamén o farán co combinado estatal na preparación para o Europeo.
Entre as galegas, están nomes como Silvia Aguete (Ence Marín Futsal), Ale de Paz (Pescados Rubén Burela), Luci (Poio Pescamar FS) e Jenny Lores (Ourense Envialia FSF). A elas súmanse tres xogadoras do Pescados Rubén Burela: Peque, Dany e Irene.
A Selección xa está coa mente posta no Europeo
Tal e como informa a Federación Galega de Fútbol, a seleccionadora Clàudia Pons convoca a 14 xogadoras para empezar a preparar xa o asalto ao torneo continental do mes de marzo, onde as españolas defenden título. E non hai mellor maneira de facelo que repetir aquela final de Gondomar, onde a Selección Española impúxose por 0-4 ás anfitrioas portuguesas. Agora, un dobre encontro amigable servirá para ver sobre a pista ás mellores xogadoras deste deporte.
Ata Navalmoral de la Mata (Cáceres) e Almendralejo (Badaxoz) desprazarase a pista da Selección para ambos os choques. O martes 23 de novembro, a localidade cacereña acollerá o primeiro dos partidos da Selección. Xa o día 25, ambos os equipos volverán medirse no municipio pacense. Os dous enfrontamentos programáronse ás 19:00 horas e poderán seguirse en directo pola canle Teledeporte.
Cabe lembrar que o combinado nacional logrou recentemente a clasificación para a final a catro continental con pleno de vitorias. Mesma folla de presentación que o equipo portugués. A ambas as seleccións uniranse tamén na pugna polo Europeo, as rusas e as ucraínas, repetindo deste xeito o póquer finalista da primeira edición. Aínda que antes de que chegue ese momento, hai que seguir traballando. O que fará Clàudia Pons e o resto do seu corpo técnico coas internacionais, a partir do domingo 21 de novembro. O venres 26, finalizará a concentración.