Xa avisaba o adestrador do Peluquería Mixta Friol, Geluco Villar, durante a previa o perigo do Alavés no seu feudo. As galegas non conseguiron entrar no partido con bo pé. A lesión de Irene “Moso” no xeonllo, na primeira metade, condicionou moito o xogo das lucenses.
Geluco Villar destacou este aspecto tras o encontro: “O partido estivo marcado pola lesión de Irene ” Moso” na primeira parte e condicionounos moito o partido. Tivemos que baixar unha mediapunta ao mediocentro e elas domináronnos bastante na primeira parte. Por iso, non estivemos cómodas na primeira metade”.
O cambio de estilo do Alavés sorprendeu as lucenses
O Alavés sorprendeu na tarde de hoxe ao conxunto de Villar. O técnico galego avisaba na previa do perigo que tiña o conxunto babazorro co seu xogo directo. Hoxe, non foi así, e as locais dominaron e tiveron o coiro durante boa parte do encontro, sobre todo da primeira metade.
“Elas hoxe sorprendéronnos porque adoitan facer un fútbol directo e hoxe todo o contrario. Xogaron e tocaron moi ben. Non nos crearon moito perigo, pero tiveron a posesión de balón. Esa cambio de estilo sumando á lesión de Irene ” Moso” fixo que non estivésemos cómodas no centro do campo”, analizou Geluco tras o pitido final.
Unha mellor segunda parte pero sen recompensa
O Peluquería Mixta Friol viu unha melloría na segunda metade pero non puideron transformala en goles: “Na segunda parte melloramos, pero tras un centro lateral recibimos o 1-0. Nós tivemos algunha ocasión clara como a do Lucía ao pau pero non tivemos a sorte de poder anotar. Non foi un partido de moitas ocasiones pero elas foron máis eficaces.
Resultado xusto e recuperar ás lesionadas
“Se facemos un balance xeral, o resultado foi xusto. Agora necesitamos recuperar xogadoras que están lesionadas. Natalia que xa quedou en Lugo porque o venres lesionouse e Irene ” Moso” que se lesionou hoxe durante o partido. Esperamos que de aquí ao próximo partido non suframos máis lesións.
Para a vindeira xornada, as galegas esperan recuperar ás xogadoras lesionadas e acadar unha vitoria na casa, fronte ao CE Seagull. O conxunto catalán visita A Reigosa o sábado 18 enero ás 16:30.
FICHA TÉCNICA
ALAVÉS: María Cristina, Maitane, Itziar, Ailen, Marta, Amancay, Alba, Miriam, María (C), Vera e Miku.
Suplentes: Maialen, Mailaen M., Sofía Ignacia, Ane Miren, Adriana, Alexia Melanie, Saoia.
FRIOL: Aroa, Natalia Llames, Natalia, Cecilia, Lucía Pardo (C), María, Andrea, Carmen, Goretti, María José e Irene.
Suplentes: Jesica, Laura, Jone, Marta.
GOLES: 1-0 Alexia Melanie (min. 51)
COLEXIADAS: Alonso Fernandez, Nahia
INCIDENCIAS: Partido da 16ª xornada da Liga Reto.
