Seis xornadas despois, o PM Friol regresa á primeira posición do grupo 1 da Primera Nacional, relegando ao Viajes Interrías á segunda praza. A vitoria das lucenses fronte a derrota das pontevedresas muda o liderado na táboa, que porén mantén ás galegas xunto co Sárdoma CF, no podio.
A cuarta e quinta posición tamén levan acento galego, co Umia CF e o Dépor ABANCA B respectivamente. As tamén coruñesas do Victoria CF ocupan porén a oitava posición, coa UD Mos na décima e Victoria FC e SD Villestro pechando a clasificación na 13ª e 14ª praza.
Vitoria do Friol ante o Mos que vale o primeiro posto
A décima xornada trouxo a terceira vitoria consecutiva para o PM Friol, que por un 2-0 soubo vencer en casa ante a UD Mos, arrebatándolle o liderado ao Interrías para colocarse de novo na primeira posición.
O partido xa comezou de cara para as de Covi Regueiro, que se adiantaron no marcador cun gol no minuto nove grazas a Nerea Lombardero. O Mos intentou recuperarse do golpe aumentando a presión, pero sen éxito.
O descanso chegaría co 1-0 no marcador, sen que ningún dos dous equipos gozara de mellores ocasións. Tras a reanudación, o dominiou continuou para as xogadoras da Reigosa, que culminarían a vitoria no minuto 77 cun gol de Yuki Nakata.
Primeira derrota do Viajes Interrías, que cae ante o Umia CF
Nove xornadas estivo o Viajes Interrías sen coñecer a derrota, sumando ademais de 3 en 3 salvo na primeira e na novena fin de semana de competición. Despois do empate da anterior xornada ante o Victoria CF, as xogadoras adestradas por Treviño víronse superadas polo Umia CF, o primeiro conxunto que logra vencelas esta tempada.
O derbi comarcal presentábase como un enfrontamento importante máis aló da rivalidade, cando só restan tres semanas para o ecuador da primeira parte da competición.
A igualdade entre dous dos mellores equipos da categoría mantivo o 0-0 durante a meirande parte do encontro, que se decidiu por un solitario gol de Miriam Domínguez xa no minuto 84. Cun 1-0, o Umia achégase ao podio e o Interrías cede o liderado.
O Sárdoma CF rasca un punto ante o Olímpico de León
Nesta fin de semana, o Sárdoma tiña a difícil tarefa de vencer no campo do Olímpico de León, quen aínda non coñece a derrota como local. As galegas tampouco foron quen de dobregar ás leonas, aínda que si lograron rascar un punto do empate cun 0-0 final.
A primeira metade tivo dominio local, cedéndolle o bando ás visitantes na segunda parte, nun duelo igualado que rematou nun reparto xusto de puntos.
O SD Villestro perde sen opcións ante o Real Oviedo B
A maior goleada da xornada sufriuna o SD Villestro que visitaba ao Real Oviedo B no seu campo caería derrotado por un 4-2. Con esta derrota, as galegas seguen sen sumar puntos, sendo o farolillo vermello da táboa.
Desde o primeiro momento as asturianas deron un golpe na mesa, cun gol no minuto 2 de Rocío Muñiz. O conxunto galego quedou desestabilizado con este tanto en contra, feito que aproveitaron as locais para anotar o segundo no minuto 9, obra de Ana Menendez.
Antes do descanso, o Villestro recuperou o ritmo, logrando frear momentáneamente ás locais. Despois da pausa, o Oviedo atacou de novo anotando aos tres minutos da reanudación, cun gol de Paula Martínez.
Minutos despois chegaría a resposta galega, cun gol de Carla Couso que puxo o 3-1. Porén o conxunto asturiano seguiu mantendo o mando do partido, marcando o cuarto tanto no minuto 83, con Denise García. Cinco minutos despois, o Villestro anotaría o seu segundo gol ao filo do final, xa sen opcións de remontada.
As santiaguesas do Victoria FC suman un punto contra o Versalles A
En Santiago de Compostela, o Victoria FC recibía ao Versalles A, co obxectivo en mente de sumar a primeira vitoria do curso, pero o soño das compostelás non se cumpriu.
As galegas lograron adiantarse primeiro cun gol de Laura Lorenzo no minuto 23, e para o descanso a vitoria era local. Porén, na segunda metade o Versalles subiu o nivel, aumentando a presión e logrando o empate no minuto 64, cun gol obra de Alba Fernández.
O filial do Dépor ABANCA álzase coa vitoria ante o Gijón FF
No partido disputado en Gijón, o filial branquiazul viaxaba en busca dos tres puntos. A primeira metade foi un pulso entre Gijón FF e Dépor ABANCA B, que faría chegar o descanso co 0-0.
As locais adiantáronse no marcador na segunda parte, cun gol de Irene Martínez no 61, pero as deportivistas souberon repoñerse do golpe. Un cuarto de hora despois, Noela Sánchez abriría a lata coruñesa e a vitoria galega pecharíase xa no tempo de desconto, cun tanto de Trillo no 93.
As cebras do Victoria CF perden ante o Sporting de Gijón B
No outro duelo entre xixonesas e coruñesas, o Victoria CF recibía en casa ao Sporting de Gijón B, nun partido dominado polas visitantes.
As asturianas sufriron para asinar a que foi a súa primeira vitoria lonxe de casa. O primeiro gol produciuse no minuto 25 tras un lanzamento da visitante Natalia Madrazo. Antes do descanso, a presión das cebras provocou un erro na defensa xixonesa, que resultou nun gol en propia porta de Lucía Hernández, poñendo o 1-1.
Na segunda metade, as xogadoras do Sporting B fixéronse co control total do encontro, anotando o segundo gol no minuto 57 e o terceiro cun penalti xa no tempo engadido, deixando o electrónico no 1-3.
