O Dépor ABANCA segue sen coñecer a derrota, desta vez respaldado polo seu fortín en Abegondo. As deportivistas sumaron na sexta xornada a súa quinta vitoria, a cuarta como locais, vencendo por un 2-0 ao SE AEM.
Con estes datos, as coruñesas son xa o mellor equipo que actúa como local, sumando 12 de 12 puntos xogando no céspede galego. Na clasificación xeral, as de Llorente son segundas no grupo norte da Reto Iberdrola, cun total de 16 puntos, dous menos que o Levante Las Planas.
Control total do Dépor ABANCA
Cun once claro, cambiando simplemente a Ale Serrano por Carlota Sánchez, a escuadra de Miguel Llorente controlou o partido de principio a fin.
Os primeiros minutos tiveron cor branquiazul, cunha posesión maioritaria para o Dépor ABANCA, pero aínda con poucas ocasións de gol. No bando contrario, as catalanas ameazaban con marcar primeiro, obrigando a Ana Valles a intervir para evitar o gol visitante.
As deportivistas seguiron intentándoo con lanzamentos de María Ruiz, Pixu e de novo da dianteira andaluza, pero sen éxito. O esperado gol non chegaría ata o borde do descanso, cun tanto de Alejandra Serrano no minuto 45 anotando pola escuadra dereita.
Na segunda metade, as coruñesas puideron sentenciar a vitoria encamiñada. O dominio do balón alternábase entre ambas filas, pero a igualdade desequilibrouse cando Laura Fernández deixaba un balón rexeitado a Ale Serrano, quen anotou o seu segundo gol da tarde.
A falta de media hora para o final, as locais mediante Jone seguían buscando o terceiro gol, pero este non se materializaba. Tamén tivo a súa ocsaión Adule, pero sen éxito.
Nos últimos minutos, o Dépor ABANCA soubo manter o ritmo para non verse superado, confiando ademais na súa cancerbeira Ana Valles. O partido rematou co 2-0 final.
FICHA TÉCNICA
DÉPOR ABANCA: Ana Valles, Cris Martínez (Andrea Sierra, min. 90), Raquel García, Inés Altamira, Goretti Neira (Patri López, min. 90), Jone Ibáñez (Eva Dios, min. 71), Paula Gutiérrez, Ainhoa Marín, Laura Fernández (Carlota Sánchez, min. 60), María Ruiz e Alejandra Serrano (Adule, min. 71).
SE AEM: Laura, Beltrán (Miró, min. 62), Barbii, Iris, Pixu, Natalia, Dulce, Astudillo (Marta, min. 89), Gómez, Taber (Alexia Jr., min. 62) e Lisa (Caroline, min. 75).
GOLES: 1-0 Alejandra Serrano (min. 45); 2-0 Alejandra Serrano (min. 53).
ARBITRAXE: García Gómez (colexio galego). Sen amonestacións.
INCIDENCIAS: Sexta xornada de Reto Iberdrola disputada na Cidade Deportiva de Abegondo ante 500 espectadores.