O Fisgón non fallou na casa e acadou unha gran vitoria tras golear ao Valladolid (8-0). As de Pili Costa déronse un festín de goles a costa dun conxunto vallisoletano que concedeu o balón as galegas e que tentou facer dano con transicións rápidas tras erro do Fisgón.
As galegas conseguiron os tres puntos contra un rival que xoga moito mellor en casa que como visitantes. As de Marín atoparon o partido esperado, cun rival pechado e cunha defensa zonal que acumulaba moitas xogadoras para dificultar a circulación do coiro das de Costa.
Pili Costa, adestradora do Fisgón: “O Valladolid é un rival que concede o balón e a posesión totalmente. Viven das transicións ofensivas e de fallos do rival”.
No pavillón de O Sequelo enfrontáronse dous equipos moi minguados polas baixas, aínda que o equipo local tirou da canteira para suplilas, o Valladolid presentouse en Marín con só 7 xogadoras. As valisoletanas expuxeron unha defensa zonal pechada tal e como previra e traballara Pili Costa nos días previos ao encontro.
Quizais grazas ao estudo e asimilación das características do rival, O Fisgón conseguiu poñerse por diante no marcador cando apenas transcorreran dous minutos de partido cun gol de Café. A defensa alta local foi capaz de afogar o ataque das valisoletanas durante todo o encontro. A intención das marinenses era roubar moi arriba para finalizar rapidamente e o máis preto posible da portería local.
Mantívose o Valladolid no partido 12 minutos máis, ata que de novo a talentosa xogadora de orixe colombiana volveu acertar para porta. Comezou así o recital de ocasións e goles das locais. Mar e Kun acompañárona como goleadoras para lograr que, ao termo da primeira parte, o marcador reflectise xa un claro 4-0. Poderían ser máis, pero a falta de precisión local impediu unha maior vantaxe estrelando polo menos 5 balóns no pau.
A segunda parte, de novo, foi de total dominio de O Fisgón: moita posesión, máis ocasións e, finalmente, máis goles. Mar de novo, Jessy en dúas ocasións e Charo deixaron o marcador no definitivo 8-0. O Valladolid non cambiou a súa formulación en ningún momento, sempre pechadas atrás, sen xogo de 5, aguantando as arremetidas locais, esperando o erro para lanzar rápidas transicións. Con esta formulación gozaron de varias ocasións, que foron ben resoltas polas porteiras locais, tanto Ana como Marina mostraron a súa calidade baixo os paus.
Na escuadra local tiveron minutos todas as xogadoras convocadas. As máis novas, Marina, Marta Gago e María Domínguez, sumaron valiosos minutos e experiencia ás súas incipientes carreiras deportivas.
Pili Costa, adestradora do Fisgón: “Hoxe tamén puidemos darlle máis minutos a outra xente, puidemos rotar máis o banco e darlle minutos a María e a Marta que tamén xogan no filial. Seguimos crecendo como equipo e seguimos competindo os partidos a pesar das ausencias e as baixas. Iso é o importante”.
Pili Costa, ao terminar o partido: “O equipo volve saír reforzado”
A adestradora local, Pili Costa, mostrábase contenta ao final do encontro: “Estou contenta polo resultado e polos minutos e rotacións que sumaron as menos habituais e as máis novas. As sensacións seguen sendo boas e o equipo de novo volve saír reforzado.”
Ao longo desta semana a O Fisgón tócalle preparar o mellor posible o partido contra un rival durísimo como é o Valdetires Ferrol. O encontro entre segundas e terceiras clasificadas do Grupo I de Segunda Nacional, disputarase o vindeiro sábado 22 de febreiro ás 18:00 horas no pavillón de Esteiro, en Ferrol.
Pili Costa, adestradora do Fisgón: “Temos que seguir traballando e crecendo como equipo. Agora temos que pensar no Valdetires e preparar o mellor posible o partido”.
FICHA TÉCNICA
O FISGÓN: Cinco inicial: Ana, Lucía, Paula, León y Café. Tamén xogaron: Karen, Mar, Jessy, Charo, María, Marta Gago y Marina. Entrenadora: Pili Costa.
UNIVERSIDAD ALICANTE: Cinco inicial: María Constanza, Sandra, Carmen, Cristina y María Rosa. También jugaron: Patricia y Arelis. Entrenadora: José Carlos González López.
GOLES: 1-0 2′ Café
2-0 14′ Café
3-0 17′ Mar
4-0 19′ Kun
5-0 27′ Mar
6-0 28′ Jessy
7-0 34′ Jessy
8-0 39′ Charo
COLEXIADOS: Jesús Miguens Magariños, Roberto Pérez Giráldez, Brais Fernández Rolo (comité gallego).
