Cinco puntos separan o Fisgón da Fervenza na clasificación. As de Pili Costa chegan cunha gran dinámica tras 4 partidos seguidos puntuando de 3 e queren seguir nesta línea para continuar na loita polos postos que dan acceso ao playoff de ascenso.
A Fervenza tamén chega ao encontro con boas sensacións tras gañar ao Castro e a Rodiles nas pasadas xornadas. De gañar, as de “Chipi” quedaríanse a tan só 3 puntos do seu rival do vindeiro sábado, O Fisgón.
Se consegue a vitoria o conxunto de Marín, dirixidas por Pili Costa, podrían asaltar o liderato, sempre e cando Viaxes Amarelle non puntúe na pista do Rodiles: “Este sábado será un partido duro contra un rival que está moi ben. Ímos afrontalo como o que sabemos que vai ser, un duelo durísimo”, engadiu Pili Costa durante a previa.
A adestradora falou da importancia que ten cada partido, de que a vindeira xornada sexa un derbi galego: “Aínda que sexa un partido entre equipos galegos, nós preparamos todos os encontro do mesmo xeito. As miñas xogadoras téñense que motivar de igual modo ante calqueira rival. Nesta categoría, se queres gañar, tes que estar sempre a un bo nivel”.
As 19:00 o Pavillón de “A Rañá” vivirá o último partido das locais en casa, e para a técnica local “é importante seguir nesta dinámica e seguir puntuando. Sería xenial poder despedir o 2019 cunha vitoria e deixar outros 3 puntos en casa. Acabar o ano gañando e dedicando unha vitoria a toda a afección”.
A adestradora das de Marín conta con todo o plantel a súa desposición con tan só “as dúbidas de Kiko e Mar por molestias”.
Partido con carácter solidario
Por se o duelo tivese pouca importancia de por sí, Marín ademais vivirá unha xornada solidaria. Aproveitando o partido entre ambos conxuntos galegos, a entrada de partido será un donativo de alimentación infantil e/o cueiros en colaboración coa Asociación “Sor Elvira”.
Pili Costa quixo facer un chamamento á afección local: “Quería dicirlle a toda a xente que este sábado o partido ten carácter solidario e que estariamos moi agradecidos se colaboran achegándose ao Pavillón de “A Raña” para traer alimentación infantil e/ou cueiros. Colaboramos cunha Asociación de Marín que se chama ‘Sor Elvira’ e imos tentar que ademais de que a xente vexa un gran espectáculo, o partido sirva para axudar á xente máis desfavorecida”.
