Dous equipos sen vitoria se enfrontan nesta fin de semana. O Ourense Envialia de Morenín viaxa a Melilla para medirse co Torreblanca, un equipo mellor clasificado pero que non coñece a sensación de trunfo nesta segunda fase. A cita será o sábado, 17 de abril, ás 18:00 horas.
O maior reto das galegas non será porén deixar de ser colistas do grupo polo título, senón facer fronte ás múltiples baixas. Unha das máis salientables é a de Marta Figueiredo, lesionada no partido ante o Futsi Atlético.
Pola contra, o equipo de Marcio Santos chega co plantel ao completo, con xogadoras recuperadas como Julia, Desi e María Soto e coa excepción de Thais, en proceso de recuperación.
O Envialia precisa a vitoria
Desde que deu comezo esta fase final, previa ao play-off, as de Morenín encaixaron tres derrotas, a primeira delas por un 1-4 ante o Burela, a segunda cun 6-3 contra o Móstoles e a terceira por un 1-4 contra a AD Alcorcón.
O obxectivo de disputar o play-off está cada vez máis lonxe, pero as portas aínda están abertas. Con cinco xornadas por disputar, as ourensás do Envialia teñen opcións para deixar de ser colistas.
O cuarto clasificado, divindo en dous a táboa, é o Futsi Atlético, con catro puntos pero un coeficiente do 1.333. Por detrás delas están o propio Torreblanca Melilla, o Roldán e por último o Envialia.
Poderás ver o partido vía streaming a través do Youtube do Torreblanca Melilla.
