O Ourense Envialia B atópase confeccionando o seu plantel para a vindeira tempada na Segunda División, e confirma a tres xogadoras. Moraima continuará no equipo galego, xunto ás incorporacións de Antía e Vega.
A ourensá Moraima é xa “da familia”, segundo o propio club, que a define como unha persoa que encarna “os valores que o noso club pretende transmitir a todxs e cada unhx dos que forman parte do mesmo. Educación, competitividade, traballo, responsabilidade, compromiso, deportividade. Mora tennos todos e os que faltan por narrar”.
A xogadora galega puido debutar na máxima categoría co Ourense Envialia na xa rematada campaña do 2020/2021, un soño “moi merecido por esta moza que traballa en silencio e sempre sempre suma”.
“Un honor que formes parte de nós Mora. A seguir desfrutando!”, transmítenlle desde o club.
Pola súa parte, outras dúas ourensás pasan a engrosar as filas do conxunto filial. “Ambición, calidade, ilusión, talento e xuventude. Un cóctel de características que se unen ao noso filial e á nosa idea de traballo de base”, explican desde o Envialia.
Tanto Antía como Vega proceden do Couto Ourense FS e son dúas futbolistas que “se adaptan á perfección á nosa filosofía de tratar de incorporar nenas da nosa cidade con proxección, ganas de medrar e desfrutar do noso deporte”.
“Benvidas ao club! A seguir camiñando e medrando xuntxs”, declaran desde o equipo.
