A Federación Española de Baloncesto celebrou este xoves, 18 de febreiro, o sorteo para os emparellamentos da Copa da Raíña, da que forma parte o Durán Maquinaria Ensino. As lucenses xogarán contra o Perfumerías Avenida, un equipo invicto en Liga Feminina Endesa.
O plantel de Carlos Cantero ten por diante o reto de superar ao peor contrincante que lle podería tocar nesta competición. As xogadoras do Ensino terán que realizar toda unha fazaña para impoñerse a un dos mellores equipos de España.
Xa o advirte o propio técnico: “Sabemos que temos ao rival máis difícil dos catro que nos poderían ter tocado”, di Cantero. Porén, o adestrador asegura que intentarán competir cun equipo de semellante nivel e “desfrutar da Copa”.
Carlos Cantero: “A intetnar competir e desfrutar da Copa”
Esta primeira ronda de Copa comezará con este duelo o xoves, 4 de marzo, ás 20:30 horas. O vixente campión, o Perfumerías Avenida abrirá o torneo ante o Ensino repetindo enfrontamento do ano pasado. A diferenza, segundo Cantero, está no nivel das salamantinas, que melloraron respecto ao curso pasado. “Outra vez Salamanca, tócanos xogar contra o mellor equipo”, afirmaba.
O duelo do Ensino enmárcase no emparellamento A, cuxo gañador competirá na semininal 1 contra o vencedor do duelo do emparellamento B, que enfronta a SPAR Girona con Movistar Estudiantes.
A Copa disputarase en modo burbulla
Este torneo celebrarase en Valencia, no pavillón municipal Fuente San Luis a porta pechada. Porén, os partidos serán retransmitidos en Teledeporte, que será a canle encargada de emitir íntegramente e en directo todos os encontros de Copa.
Seguindo todas as medidas de seguridade e prevención sanitarias por mor da COVID-19, a competición celebrarase en modo burbulla, extremando as precaucións para a garantir a saúde de xogadoras, corpos técnicos e persoal do pavillón.
