Xornada de claros e escuros para o baloncesto galego na LF Endesa. O Durán Maquinaria Ensino estreaba adestrador, xogando ás ordes de Fernán Varela, e rematou a fin de semana con triunfo (49-75) ante o Leganés. Pola súa banda, o BAXI Ferrol non puido afianzar o triunfo, e caeu nos últimos cinco minutos ante o Cadí La Seu.
Tras a celebración da 18ª xornada, as lucenses marchan décimas con 16 partidos disputados e 21 puntos, mentres que as ferrolás son 13ª con 20 puntos obtidos en 16 partidos.
O Ensino vence de novo
O duelo da fin de semana estaba marcado no calendario do Ensino, non só pola competición, senón pola estrea de Fernán Varela á fronte do equipo e a volta do plantel á pista tras o parón obrigado pola COVID.
Desde os primeiros minutos puido verse no parqué do pavillón de Europa a igualdade entre as galegas e as xogadoras do Leganés. Os primeiros dez minutos deixaron poucas ocasións baixo o aro, poñendo o12-17 no marcador cunha lixeira vantaxe visitante.
Para o segundo cuarto, o Ensino rompeu o partido. A base de tiros exteriores e con especial acerto nos tiros de campo, as de Varela tomaron a dianteira superando ás locais nos ataques (25-40)
Tras o descanso, o Leganés volveu con forza para manter un pulso coas lucenses, que porén lograban manter a vantaxe conseguida na primeira parte, pero sen permitirse baixar o ritmo.
No derradeiro cuarto, o Ensino rematou unha merecida vitoria, liderado por Laura Aliaga, Helena Oma, Alba Prieto ou Natalie Van den Adel, as mellores valoradas entre as galegas. O encontro finalizou cun 49-75.
Fernán, “contento” no seu primeiro partido
Á fin do duelo, o novo adestrador das lucenses, Fernán Varela, asegurou estar “contento pola vitoria e o traballo realizado”. O preparador asegurou que o seu plantel impuxo o ritmo “desde o principio”, co dobre valor de facelo á volta dun parón longo. “As nosas circunstnacias e as do Leganés non son as óptimas para competir, pero creo que saimos moi ben”, apuntou.
Varela tamén situou a clave nas xogadas do contraataque, ao ver ao rival como un equipo “dinámico, que xoga cun ritmo alto e ben en transición”. Non menos importante foi a defensa, que serviu para “impoñer o ritmo que nos convenía para o partido”.
En liñas xerais, o míster está “contento polo esforzo. Todas contribuíron moito a que o equipo levase a dinámica que tivo o partido”. Malia desfrutar da vitoria, o Ensino terá que pensar xa no seguinte partido, que as enfrontará ao Cadí La Seu.
Os minutos finais: o maior rival do BAXI
No outro bando do baloncesto galego, o BAXI Ferrol de Lino López rozou unha vez máis a vitoria, vendo como esta escapaba nos minutos finais.
O rival desta xoranda das universitarias, o Cadí La Seu, tardou en entrar no partido, deixando que as ferrolás dominaran os primeiros minutos no parqué.
No segundo tempo, Raventos, Pivec e Etxarri iniciaron a remontada das locais, adiantando pola mínima ás galegas, que chegaban ao descanso tres puntos abaixo (29-26).
Despois do paso por vestiarios, o duelo comezou coa lesión de Milica Ivanovic, limitando as posibilidades de rotación de Lino López no banco. No terreo de xogo, o duelo continuou sen moito acerto baixo a canastra por parte de ningún dos dous conxuntos, pero con moita intensidade defensiva. As ferrolás souberon impoñerse ás locais desde a liña de tres, con Koenen e Rodríguez destacando nos tiros exteriores.
Así, o tempo final chegou co empate no 40-40 e todo por decidir. Porén, o BAXI Ferrol non logrou manter a vantaxe que obtivo nos primeiros minutos do último cuarto, e pasado o ecuador a internacional Etxarri decantou a vitoria para as locais (60-54).
🎙Declaraciones de @linolopez04 tras el partido Cadí La Seu @sedisbasquet 60 – BAXI Ferrol @UniFerrol 54 #SienteelUni pic.twitter.com/AxkalN4imz
— Baxi Ferrol (@UniFerrol) January 22, 2022
Para Lino López, a derrota galega explícase na falta de “acerto, o cansancio, a falta de rotación e a lesión de Milica que condiciona a rotación exterior”. Con todo, o preparador é positivo e quédase cun “traballo bo nunha pista moi difícil”. Sen tempo para a análise, as unviersitarias deberán preparar o duelo deste mércores ante o Embutidos Pajariel Bembibre na recuperación da 15ª xornada.
