O Durán Maquinaria Ensino precisaba reencontarse coa esencia que lle fixo merecedor dun posto na Copa da Raíña e de estar entre os primeiros na Liga Feminina Endesa. Esta recuperación do seu bo xogo produciuse nun partido con tintes de final, ante un Cadi La Seu moi competidor, e ao que tivo que vencer nunha xogada final (76-73).
“Creo que o baloncesto foi xusto con nós”, dicía Carlos Cantero, adestrador das galegas, tras recordar como o seu equipo foi por diante en todo momento pero cunha vantaxe mínima.
O Ensino adiantábase pero non afianzaba a vitoria
Por fin sobre a pista puidose ver a un Ensino superior ao seu rival, pero as lucenses tiñan problemas para afianzar a súa vantaxe sobre o Cadi La Seu.
Saltou forte á cancha o equipo local, cun tanto aos dez segundos do inicio do encontro, obra de Stanacev. O festival de tantos nada máis comezar o duelo seguiu da man de Hempe e un triplo de Gimeno, que tivo contestación nunha canastra de Yurena Díaz.
As galegas distanciábanse xa das visitantes, pero Laia Raventós encargábase de que non se foran demasiado no marcador. Catro puntos seguidos da baloncestista, seguidos dun tiro libre de Laure Resimont poñían o 12-7 no luminoso.
O alto ritmo de xogo beneficiaba ás xogadoras de Cantero, cómodas na súa propia pista. O seu acerto no xogo exterior permitíalles ter un colchón de cinco puntos, pero na metade do primeiro tempo as catalás deron coa fórmula para responder ás galegas. Tres puntos de Irati Etxarri facía que o Cadi La Seu pisáralle outra vez os talóns ás locais.
Porén, Hempe aproveitaba os erros defensivos na liña interior das visitantes, mantendo ao Ensinopor diante. Isto non amedrentaba ás catalás, que grazas a Dornstauder colocábanse por primeira vez por diante pola mínima, unha diferenza dun puntos que solucionaron as lucenses cun parcial 5-0.
No segundo cuarto a tónica foi moi similar, pero co Cadi La Seu iniciando o marcador. Un tanto de Bahí provocaba que Catero parase o cronómetro, que non impediu que as visitantes seguisen adiantándose (22-25). Minutos máis tarde, o Ensino reaccionou, e aproveitou as imprecisións e os problemas na fluidez do xogo rival. Cun contundente parcial 10-0 chegaba o 32-25 ao marcador.
O intercambio de canastras seguía sobre a pista do Pazo dos Deportes de Lugo, con especial acerto no bando local grazas a White e Gimeno, cun triple que poñía o 38-29. Antes de volver a vestiarios, o Cadi La Seu apretaba para recortar distancias, mentres que o Ensino loitaba por manterse por riba. Cantero solicitaba un tempo morto, pero o electrónico marcaba o 38-33 na metade do duelo.
Segunda metade
A dinámica tras o descanso foi moi similar, cun tramo inicial favorable ás catalás, e un conxunto local máis frío, que só puntuaba con Laura Aliaga desde o tiro libre. Con todo, reaccionaron a tempo cun tiro de Prieto, o terceiro triplo de Gimeno e dous tiros libres dentro de Helena Oma, que facía que as galegas se situasen a sete puntos por enriba.
O cadro catalán seguía apretando, pero un parcial duro por parte das lucenses poñía 10 puntos de distancia entre locais e visitantes. Unha diferenza que se mantivo ata os instantes finais do terceiro parcial, chegadno ao último cuarto cun 59-53.
Carlos Cantero vía como as súas xogadoras, cando mellor estaban, baixaban o ritmo e, en lugar de aumentar a renda sobre as rivais estas recortaban distancias no marcador.
O último cuarto foi o único no que as visitantes lograron gañar, cun 17-20 final que non foi suficiente para a remontada. O encontro era un vaivén de ocasións convertidas, que impedía ver a un gañador claro do duelo.
Un partido decidido nun triplo
Chegados aos instantes finais, os esforzos e traballo previo de ambos equipos durante os 40 minutos de partido pouco pareceron importar. Unha das últimas xogadas deixaba o balón en Alba Prieto, que poñía o 76-73 no marcador cun triplo que entrou no aro tras tocar no taboleiro.
Menos sorte tivo segundos despois Yurena Díaz para as visitantes. A xogadora tamén o intentou desde a liña de tres, coa mala sorte de ser un tiro rechazaro polo aro.
Un duelo con categoría de final para dous conxuntos que loitan por formar parte do play off decidiuse en cuestión de segundos, con vitoria final para as galegas.
Laura Aliaga: “Foi un partido difícil onde elas puxeron un nivel moi alto e ao final a balanza venceu ao noso lado, cun gran triplo de Alba que todas celebramos”
A deportista Laura Aliaga comentaba tras o encontro que na súa opinión o cruce foi “un partido difícil onde elas puxeron un nivel moi alto e ao final a balanza venceu ao noso lado, cun gran triplo de Alba que todas celebramos”. A xogadora número 12 do Ensino incidía no sufrido do trunfo, pero salientaba o orgullo de todo o plantel por ter gañado a un rival directo. “Moi contentas, orgullosas do traballo e a seguir”, concluía.
O seu adestrador coincide na súa análise, e apunta que “merecíamos gañar e así foi porque fumos case todo o partido arriba no marcador. Dábame medo que cando collíamos puntos de vantaxe non conseguíamos irnos a 15, houbo varias situacións onde collíamos esa vantaxe pero non conseguíamos parar o arreón do rival e nos remontaban a cinco puntos”. Final feliz no pazo dos Deportes, co Ensino ocupando a sétima posición e co basketaverage gañado ao Cadi La Seu.
📹 #LFEndesa: Seis segundos, partido igualado y…
Aparece @Albprimar para dar la victoria al @EnsinoLugoCB
📺 Revive el partido en #CanalFEB ⬇ https://t.co/lNNZ6zpI7R pic.twitter.com/XEUrVjoeM8
— CompeticionesFEB (@CompeticionFEB) February 20, 2021
FICHA TÉCNICA
76) DURÁN MAQUINARIA ENSINO: Aleksandra Stanacev (9), Laura Aliaga (7), Helena Oma (7), Vega Gimeno (15), Merritt Hempe (18) -cinco inicial-. Tamén xogaron: Bea Sánchez (2), Alba Prieto (8), Chatrice White (10), Marta Blanco (-), Alicia Villegas (-).
73) CADI LA SEU: Laia Raventós (12), Yurena Díaz (14), Laure Resimont (14), Irati Etxarri (11), Quinn Dornstauder (6) -cinco inicial-. Tamén xogaron: Laura Peña (5), Ariadna Pujol (-), Gala Mestres (5), Georgina Bahí (4), Serena-Lynn Geldof (2).
PARCIAIS: 22-20; 16-13; 21-20; 17-20.
ÁRBITROS: Olivares Bernabeu, Martínez Prada e Piñeiro Amondaray.
INCIDENCIAS: Partido correspondente á xornada 26 da Liga Femenina Endesa disputado no Pazo dos Deportes de Lugo a porta pechada.
