Unha vez rematada a primeira volta e acadado o posto na Copa da Raíña, o Durán Maquinaria Ensino respira tranquilo e afronta a segunda volta sen a tensión da primeira. Para estreala, terán un rival moi duro, o líder invicto da Liga Feminina Endesa, o Perfumerías Avenida. Xogarán o sábado, 19 de decembro, ás 18:00 horas en Salamanca.
“É moito máis difícil dar a sorpresa este ano porque son un equipo completamente diferente ao da tempada pasada. É un equipo de Euroliga, que a xoga en burbullas en vez de cun partido á semana. Isto permítelle chegar aos partidos de Liga española moito máis descansado e a tope”, explica o adestrador lucense, Carlos Cantero.
Carlos Cantero: “É prácticamente imposible dar a sorpresa este ano a un dos de arriba”
Por iso, e sendo consciente de que “é prácticamente imposible dar a sorpresa este ano a un dos de arriba”, Cantero pídelles ás súas xogadoras que “disfruten do partido e das xogadoras que van ter diante”.
Partido sen presión e para desfrutar para o Ensino
Sabe ben que, malia os éxitos que está a asinar o Ensino, e non con moita facilidade, o mellor que poden sacar deste encontro co mellor equipo da categoría é competir “de ti a ti contra elas e xogar sen presión”.
O posto para disputar a Copa da Raíña está conseguido, así que para esta segunda parte da tempada o average non é tan importante. En resumo, para o técnico o importante ante o Perfumerías Avenida é “xogar desfrutando, saber contra quen xogamos e sendo realistas”.
Os seus plans pasan por aproveitar os 40 minutos para rotar máis ás súas xogadoras e darlles minutos para que o poidan aproveitar cara os próximos partidos.
Por parte das galegas, Bea Sánchez segue de baixa aínda que “evoluciona positivamente” e está en observación. Segundo expón Carlos Cantero, o corpo técnico intentará incluir á xogadora nos adestramentos da próxima semana para ver como responde no traballo de grupo e que poida estar para o seguinte encontro.
Entre as filas do líder non estará Marica Gajic, que segue recuperándose dunha lesión e aínda non se incorporou ao grupo. Unha preocupación menos para as do Durán Maquinaria Ensino, xa que Gajic ven de recoller o seu galardón como mellor baloncestista do ano de Bosnia.
Despois deste partido, as baloncestistas da máxima categoría terán que facer un esforzo extra. En Nadal o baloncesto non para e os equipos teñen a 17ª xornada o martes, 22 de decembro, e a 18ª, o domingo 27.
🔥Jornada XVI🔥
Segunda vuelta de la #LFEndesa, ¡esto no para!.🆚 @CBAvenida
🗓️ 19 de diciembre a las 18:00h.
🏟️ Salamanca.#SomosEnsino #VoltaráLoita pic.twitter.com/3ZI3SH2HIj— Ensino Lugo (@EnsinoLugoCB) December 15, 2020