O Ensino vése superado polo SPAR Gran Canaria

Na celebración da 20ª xornada da LF Endesa, o Durán Maquinaria Ensino viaxaba a Gran Canaria para xogar contra o SPAR, nun duelo no que as lucenses necesitaban vencer para alonxarse das posicións de descenso.

Non foi así, malia unha melloría das galegas na segunda metade do partido. Cun 73-61 final, as galegas suman a segunda derrota consecutiva, quedando na 13ª posición da táboa.

SPAR Gran Canaria vs Ensino / JOSÉ DE HARO

O Ensino segue pagando a praga de lesións

Malia que neste partido por primeira vez na tempada todas as xogadoras do plantel estiveron dispoñibles para xogar ás ordes de Fernán Varela, o equipo aínda non está en forma.

O encontro comezou cun SPAR Gran Canaria forte liderando o xogo, e adiantándose ás galegas no marcador, obrigando a Varela a solicitar un tempo morto (15-7) pasado o ecuador do primeiro tempo. As indicacións do técnico non xurdiron efecto, e as canarias seguiron puntuando mentres que o Ensino sufría unha sequía en ataques que mantiña o marcador no 22-7.

Tras un novo parón no cronómetro, as lucenses reencontraronse co aro, aínda que sen acadar bos resultados. O primeiro cuarto rematou no 24-11.

Para o segundo tempo, as xogadoras de Lugo non tiñan maneira de frear a rivais como Caldwell e Giomi, que seguían anotando, sendo especialmente efectivas nos tiros de tres. Cando o árbitro pitou o descanso, o electrónico marcaba xa o 44-26.

Na segunda parte, o Ensino logrou mellorar o seu xogo, e aumentou a presión na área rival, con ofensivas lideradas por Aliaga, Van den Adel e White. O terceiro foi o mellor cuarto das galegas, que tamén conseguiron dobregar ás canarias desde a defensa.

Porén, o resultado seguía favorable ás locais, que chegaban ao último tempo coa tranquilidade de ter o partido practicamente resolto. Sen cambios no guión, o conxunto canario resolveu o encontro no tempo final, no que as galegas xogaron máis organizadas, e acertando nos tiros exteriores, pero sen asinar a remontada. O duelo rematou co 73-61.

O vindeiro domingo día 20, o Ensino terá unha nova final, xogando en casa ante o Tenerife desde as 18:30 horas.