Tempos complicados para o Durán Maquinaria Ensino. O grupo das lucenses non consegue saír da dinámica de derrotas, cun plantel tocado polas lesións. Na última semana, as galegas perderon dúas veces, na EuroCup ante o Kangoeroes e na LF Endesa ante o Movistar Estudiantes.
Con estes resultados, as xogadoras adestradas por Miguel Ángel Ortega teñen xa poucas posibilidades de seguir na competición europea, e mantéñense na zona baixa da máxima categoría española, onde ocupan a 14ª posición.
Derrota en Bélxica ante o Kangoeroes
O pasado mércores, as lucenses desprazáronse a Bélxica nunha nova xornada da EuroCup, onde loitaron por unha necesaria vitoria, que se escapou definitivamente no último cuarto.
No comezo do encontro, o Ensino foi quen de manter o pulso ao Kangoeroes, que malia contar co factor cancha ía perdendo de dous pasados os primeiros 5 minutos. As belgas apretaron para igualar o resultado, situandose a un de vantaxe a falta de dous minutos para a fin do parcial. O man a man continuou antes da pausa, cun 18-18 e o partido aberto á fin do primeiro cuarto.
No segundo tempo o guion mantívose, co poder cambiando de mans entre belgas e galegas, aínda que con lixeiro dominio do Ensino. Así, o descando chegaría cun 30-36 favorable ás xogadoras de Ortega.
Tras o paso por vestiarios, o equipo de Lugo comezou a cometer máis erros en defensa, que salvaba co acerto en ataque, mantendo o duelo igualado e o empate no marcador. O último cuarto comezou cun 47-47 no electrónico.
Con todo por decidir, as forzas das lucenses fraquearon no tempo final. Na primeira metade deste derradeiro parcial o Ensino soubo poñerse por diante de novo, pero as xogadoras comezaron a acusar o cansancio acumulado, nun banco con poucos repostos. O Kangoeroes fíxose coa vitoria nos últimos cinco minutos, asinando un parcial 13-0, botando por terra a ilusión galega.
Esta semana, o club galego xogarase definitivamente a súa permanencia na EuroCup, visitando ao Valencia BC.
Derrota en Madrid ante o Movistar Estudiantes
O Ensino chegou á décima xornada de LF Endesa coa vontade de vencer para deixar atrás o mal sabor de boca do torneo europeo. Porén, o seu rival, o Movistar Estudiantes, foi superior de principio a fin, dobregando ás galegas.
O partido comezou cun Ensino entregado, controlando o encontro e vencendo pola mínima, cun 13-15 no primeiro parcial. Porén, o Movistar Estudiantes respondeu a base de triplos para levarse o cuarto cun 23-15.
No segundo tempo, de novo as galegas estiveron rozando o liderado do duelo, sobrepoñéndose a uns primeiros minutos de sequía baixo o aro. Con todo, o descanso chegaba con vitoria madrileña por un 37-28.
Na segunda metade, a historia non mudou, cun equipo lucense sempre por detrás e loitando por riba das súas posibilidades. No terceiro cuarto a distancia ampliouse a un 54-42, mentres que para o tempo final, as galegas non tiveron tempo para reaccionar, perdendo por un 73-57.
Con esta nova derrota, o Ensino é o segundo equipo da división con máis partidos perdidos de forma consecutiva, só por detrás do Tenerife e empatando co SPAR Gran Canaria.
