Despois de tres derrotas consecutiva, o Durán Maquinaria Ensino reencóntrase coa vitoria. As galegas disputaron a sexta xornada en terras canarias, enfrontándose ao Tenerife, ao que venceron nos minutos finais cun resultado 57-59.
Neste encontro, a xogadora máis destacada foi Helena Oma, que tirou do equipo lucense e foi proclamada MVP, con 15 puntos, cinco rebotes e unha asistencia. Tras este resultado, o equipo de Lugo marcha oitavo na clasificación.
Emocionante remontada
Nos primeiros minutos de partido o Tenerife non tardou en conseguir unha vantaxe de sete puntos, con Tikvic especialmente acertada cara o aro. Malia a desvantaxe inicial e as dificultades que está a atravesar un plantel tocado polas lesións, as xogadoras do Ensino empurraron para non deixar que as rivais se escaparan no marcador.
A base de defensa e acerto nos tiros, para o minuto seis as galegas empataran o partido e cun tiro libre de Sofia da Silva poñíanse por diante. Porén, as locais seguiron apretando para levarse o primeiro parcial por un 12-11.
No segundo cuarto, a distancia entre ambos equipos medrou, cun cadro canario especialmente inspirado, que non deixaba escapar as oportunidades de anotar da man de Davis e Tikvic. O Ensino reaccionou cun parcial 0-4, pero aínda non era suficiente para alcanzar ao Tenerife. O descanso chegou co 31-24.
Tras o paso por vestiarios, o guion non mudou e o conxunto local seguía dominando no partido. Porén, as galegas non baixaban os brazos, mantendo a pouca distancia ás canarias. Malia o acerto de Oma e Da Silva, o Tenerife marchaba ao último cuarto cunha vantaxe de dez puntos.
Contra todo pronóstico, as de Miguel Ángel Ortega subiron unha marcha máis e encamiñaron a remontada. Co 49-43 no electrónico, o técnico local viuse obrgiado a parar o reloxo para reorganizar ás súas xogadoras. As indicacións non serviron, xa que a través do acerto de Aliaga o Ensino continuaba recortando distancias.
O empate chegou cunha canastra de Orsili, que poñia o 53-53 no luminoso, a falta de dous minutos para a bucina. Cun tramo final de infarto, ambos equipos loitaron polos dous puntos da vitoria. Con só 30 segundos restantes, Bahí anotaba de tres para poñer o 55-58. Entón, Ocete encestou achegándose perigosamente ás galegas, e estas remataron o partido cun tiro libre de Helena Oma.
Co 57-59, os dous puntos marcharon para Lugo.
FICHA TÉCNICA
TENERIFE: Kaela Davis (17), Ivana Tikvic (20), Kristina Raksanyi (6), María Pina (5), Gaby Ocete (2) – cinco inicial –. Tamén xogaron: Paola Ferrari (4), Anne Senosiain (-) e Janelle Bailey (3).
DURÁN MAQUINARIA ENSINO: Chatrice White (4), Paula Hoyuelos (3), Laura Aliaga (9), Georgina Bahi (4), Marina Lizarazu (5) – cinco inicial –. Tamén xogaron: Alba Prieto (), Alessandra Orsili (12), Helena Oma (15) e Sofía Da Silva (7).
MARCADOR: 12-11, 19-13, 14-11, 12-24
ARBITRAXE: Jorge Muñoz García, Cristian Martín Vázquez e José María Arresa
INCIDENCIAS: Partido da sexta xornada de LF Endesa disputado no pavillón insular Santiago Martín.
