Sen medo, pero con moito respecto. Así parece que afrontará o Durán Maquinaria Ensino de Lugo o cruce desta semana na Liga Feminina. As lucesnes reciben no Pazo as terceiras clasificadas, o Lointek Gernica Bizkaia. O partido está marcado para as 19:00 horas de hoxe, 29 de febreiro.
A xornada 22 trae a Lugo a un oso duro de roe pero as galegas do Ensino non lle perderán a cara ao encontro. Chegan sen baixas para medir forzas cun equipo que o técnico local, Carlos Cantero, cualifica como “un equipo moi forte”. En rolda de prensa previa ao cruce, explicaba o técnico do Ensino que “persoalmente, encántame a súa plantilla e están a un bo nivel”.
Cantero: “Ensino e Gernica comparten puntos fortes”
Segundo Cantero, Durán Maquinaria Ensino e Lointek Gernica Bizkaia teñen puntos de semellanza no seu xogo. Precisamente nese aspecto detallaba que lle preocupaba do rival que “é un equipo que ten os mesmos puntos fortes que nós pero incluso os mellora”.
Consultado polas chaves do partido, o adestrador das lucenses apuntaba que as posibilidades do Ensino pasaban por “non irnos do partido mentalmente e por aguantar a presión e ter un bo acerto que nos manteña. Estar ao ese nivel que elas van a ter durante os 40 minutos”.
Con todo, o Maquinaria Duran non lle perde a cara ao partido. Na cancha verase fronte a fronte cun rival que se lle parece en xogo pero que por algo está por diante na táboa. Son bloques que xogan dun xeito semellante.
O preparador do Ensino afróntao con respecto pero sen baixar os brazos en ningún momento. “As veces o feble é quen de gañar e xogar mellor”, avisa.
Consultado polas posibilidades de entrar no play-off, Cantero relataba que descoñecía cantas victorias “farán falta para que nos metamos. Están os averages por decidir”, matizaba. Segundo o adestrador das lucenses “era asumible baixar ao sétimo posto. Logo da Copa teremos un calendario máis asequible”, prognostica.
Precisamente ao respecto do partido de Copa fronte ao Perfumerías Avenida de Salamanca, Carlos Cantero non perde o foco e comenta que polo de agora, as xogadoras do Ensino están “centradas no Lointek Gernica Bizkaia. Temos estudiado o partido contra Salamanca, pero non podemos descoidar este encontro. É importante. Son superiores e xogamos na casa“, puntualizaba en rolda de prensa.
No conxunto visitante será baixa Mazionyte por unha escordadura. Pero serán da partida Roundtree e Nogaye Lo que arrastraban doenzas. Veñen de perder na casa en Liga co Spar Citylift Girona (60-69), polo que quererán colleitar un triunfo sanador. As vizcaínas ocupan a terceira praza na táboa clasificatoria con cinco victorias máis cas galegas. Veñen de ser eliminadas da competición europea e precisan recuperarse do golpe animicamente.
As xogadoras que adestra Mario López non serán, polo tanto un rival sinxelo para o Ensino. Pero quen dixo medo?
