O Durán Maquinaria Ensino volve á competición ligueira, despois de ser eliminadas da Copa polo Perfumería Avenida, cun partido ante o Al-Qázeres. Lucenses e extremeñas cítanse no Pazo este venres, 12 de febreiro, ás 19:45 horas.
Malia ser superiores ao longo da tempada, o Ensino non pode confiarse ante un rival que se xoga o seu futuro. As extremeñas ocupan a penúltima posición, con 33 puntos obtidos en seis vitorias e 21 derrotas.
Ademais, o Al-Qázeres ven dun mal momento deportivo, no que acumula tres derrotas consecutivas. A última vitoria que sumaron as que serán visitantes das lucenses foi ante o Ciudad de la Laguna Tenerife, o sexto clasificado da Liga Femenina Endesa.
O Ensino chega nunha posición similar, na sétima, con 38 puntos obra de 12 vitorias e 14 derrotas. Porén, as galegas tamén chegan dunha derrota, no seu caso ante o Campus Promete, outro equipo que escapa do descenso.
Por outra parte, tras disputar a Copa, o equipo de Lugo non chega no seu mellor momento fisicamente. Como anunciaba Cantero en rolda de prensa, “chegamos moi xustas”.
Carlos Cantero: “Quizais o momento no que máis curtas de efectivos estamos sexa agora”
As extremeñas venceron na ida ao Ensino
Para esta nova xornada, o Ensino deberá aprender dos seus erros. Estes leváronnas a perder ante o Al-Qázeres no partido de ida desta tempada.
Esta derrota afastou momentaneamente ás lucenses de disputar a Copa, como finalmente si fixeron. Naquela 13ª xornada, o equipo de Cantero non puido superar ás extremeñas, que aproveitaron os erros galegos da primeira metade para levarse finalmente o trunfo.
Reencontro con Fiona O’Dwyer
Con esta nova xornada regresa ao Pazo a irlandesa Fiona O’Dwyer. A actual xogadora do Al-Qázeres militou co equipo galego entre o 2017 e o 2020.
Na súa última tempada en Lugo, a baloncestista participou en 22 partidos, cunha media de 17:41 minutos por partido, nos que metía 4,9 puntos de media, destacando especialmente desde o tiro libre, onde tiña unha efectividade do 56,3%.
Este ano, no conxunto extremeño, O’Dwyer só xogou en nove partidos, pero mantén unhas cifras similares ás do curso anterior, cunha mellora considerable desde a liña de tiro libre, na que agora ten un acerto do 75%.
