O Durán Maquinaria Ensino recibe no Pazo dos Deportes de Lugo ao IDK Euskotren na Liga Feminina Endesa. A clasificación os separa en dous postos e un punto. O cruce está previsto para mañá, domingo 9 de abril, a partir das 12:30 horas. Dirixirán o choque o equipo arbitral composto por Paula Lema Parga, Jesús Marcos Martínez Prada e Eva Areste Giralt.
Antonio Pernas, adestrador do conxunto lucense, animaba á afección a acudir ao Pazo dos Deportes “Quédannos dous partidos e é un bo momento para apoiar o grupo excepcional de xogadoras que este ano deuno todo pola camiseta do Ensino”.
Para este partido co IDK Euskotren, Antonio Pernas non espera baixas. É consciente de que “a tempada vaise facendo longa. O que non che sae por unha banda sáeche polo outro. É unha tempada longa. Hai típicas sobre cargas pero creo que teremos a todas dispoñibles”, explicaba na previa ante os medios de comunicación.
Sobre o rival desta última xornada na casa na Liga Endesa, o IDK Euskotren, Antonio Pernas decía que se trata dun “grupo sempre complicado. Manteñen un bloque da tempada anterior. Arrastraron moitas lesións esta tempada pero suplíronas con fichaxes de mesmo maior calidade. É un equipo que sempre ten un bloque de 7-8 xogadoras que xogan a gran maioría dos partidos. Quizais este ano lastráronlles moito as lesións e non logrou unha regularidade que lles gustase pero estamos a falar dun equipo que xogou tamén Europa. Iso conleva un desgaste adicional. Son xogadoras dunha tremenda calidade pero que, durante o ano, coido que polo desgaste físico e de lesións, viuse un pouco irregular”.
Sobre o que agarda como obxectivo para o Durán Maquinaria Ensino nestas dúas últimas xornadas da Liga Endesa, Antonio Pernas explicaba que busca: “Acabar coas mellores sensacións posibles nun ano que foi duro polas lesións e pola propia competición. Gustaríanos gañar e terminar a tempada con dúas vitorias. Pero buscamos acabar coas mellores sensacións posibles”.
Lembraba Antonio Pernas que o “obxectivo do club era a permanencia. Que non se nos esqueza como ao longo da tempada foi evolucionando o equipo. Houbo un desgaste físico adicional nos meses de decembro – xaneiro – febreiro que agora estamos a notar”.
É por iso que na opinión do adestrador do Durán Maquinaria Ensino un bo obxectivo sería “acabar coas mellores sensacións, darnos o gustazo de acabar en casa xogando como xogamos de ben durante todo o ano e gañar o máximo de partidos posibles”.
“Quédannos dous partidos, un en casa co IDK, o último da tempada”, explicaba o técnico que aproveitaba para facer un chamamento á afección: “É un bo momento para apoiar ao grupo excepcional de xogadoras que este ano deron de todo pola camiseta do Ensino. Algunhas veces déusenos ben, pero sempre houbo un compoñente de loita, de competición e de esixencia alto. Sería un bo motivo o agradecerlles o seu esforzo coa presenza e o apoio da afección”, declaraba ante os medios na previa do partido.
