O Durán Maquinaria Ensino perdeu o xogo que tantas alegrías lle deu nas xornadas previas ao parón, pero necesitan recuperalo para vencer a un rival directo. Este sábado, 20 de xaneiro, ás 19:15 horas as lucenses recibirán ao Cadi La Seu.
“Levamos toda a semana falando de que temos un partido clave da tempada e así o estamos preparando e imos competilo”, declara convencido o adestrador, Carlos Cantero.
Actualmente o Ensino ocupa a sexta posición, cos seus 35 puntos sumados en 11 vitorias e 13 derrotas. Dúas delas sufridas nas dúas últimas xornadas, ante rivais tan dispares como o penúltimo, o Bembibre, e o líder, o SPAR Girona.
Tamén con 35 puntos, pero na oitava posición está o Cadi La Seu. Porén, as catalás xa venceron no seu último partido a un rival directo na metade da táboa, o IDK Euskotren, que tamén acumula 35 puntos.
En palabras do adestrador de Lugo, este é un conxunto que está nun gran momento de forma e que se caracteriza por xogar “con bastante ritmo e xera desde o un contra un e busca moi ben as costas”.
Porén, o Ensino sabe como superar ao Cadi La Seu. Xa o fixo na undécima xornada, cando as lucenses venceron a domicilio cun 65-78 ao seu favor coa destacada actuación de Hempe e Gimeno.
O Ensino está recuperado físicamente, pero non no xogo
Para este partido, Cantero aínda non poderá contar con Natalie Van den Adel. A xogadora segue illada pola COVID-19 e o Ensino ten que agardar para volver contar con ela. “Hai que ter en conta tamén como volve, que síntomas ten de efectos secundarios cando volva adestrar, tema de peso. Xa sabemos que parar 14 días a xogadoras de alto rendemento é matalas, pero iso é co que hai que traballar”, engadía o técnico.
Carlos Cantero: (Sobre Van den Adel) “Parar 14 días a xogadoras de alto rendemento é matalas, pero iso é co que hai que traballar”
No relativo ao resto do plantel, o adestrador asegura que o break serviu para recuperar ás xogadoras e que agora o traballo consiste en recuperar as boas sensacións.
Ademais de ter a vista posta neste encontro ligueiro, o Ensino pensa tamén xa na Copa da Raíña, que as enfrontará ao Perfumerías Avenida o 4 de marzo.
