O Durán Maquinaria Ensino afrontará unha nova tempada en LF Endesa, a máxima categoría do baloncesto español, na vindeira campaña, pero precisa apoios. Así o expresou o seu presidente, Manuel Durán, na rolda de prensa de conclusión do presente curso.
O conxunto lucense rematou na zona media da táboa, na décima posición, nun ano no que o obxectivo pasaba por acadar praza para a Copa e o playoff, e no que as galegas pasearon por Europa apoiadas pola afección.
“Agora temos que replantexar todo o club de arriba abaixo e está claro que temos que conseguir mais apoios para que isto sexa sustentable,. Non pode estar sustentado por dúas empresas, isto é algo que é para toda a cidade e nós temos que pensar que isto é deficitario agora mesmo”, explicou o mandatario do Ensino.
Manuel Durán: “A avaliación é moi positiva tendo en conta os medios que temos”
Durán recalcou que o traballo da entidade “é impresionante e eu o que pido e que as institucións non se esquezan do Ensino, que é un club con 40 anos, que funciona e que ninguén esta aquí a gañar diñeiro, estamos para axudar. Isto é algo social, e deberiamos telo”.
Durante a súa intervención, admitiu que “notamos a falta, as autoridades brillaron pola súa ausencia, non baixaron a vernos ou o fixeron rara vez e case sempre os mesmos. É duro saber que estamos sós. Detrás da pancarta poñémonos todos apoiando o deporte feminino, pero é mentira. O deporte feminino apoiamolo algunhas persoas. As autoridades veñen a outros eventos, sobre todo masculinos, pero ao feminino cústalles, non sei o motivo”, apuntou.
Manuel Durán: “Sabendo que o baloncesto é un deporte moi profesional en España e as fichas non son as doutros deportes, poder ter un equipo competitivo resulta moi complicado”
Por iso, subliña que “me gustaría que pasaran máis a vernos para que vexan as necesidades que temos. Hai outros clubs que son rentables por si, deportes profesionais que teñen outras axudas que non precisan ser públicas”. Malia que o baloncesto feminino non é un deporte minoritario, explica, as axudas son escasas e “creo que deberían invertir. Con moi pouco facemos moitas cousas. Sabendo que o baloncesto é un deporte moi profesional en España e as fichas non son as doutros deportes, poder ter un equipo competitivo resulta moi complicado”.
Mirando á 2022-2023
De cara a vindeira tempada, o presidente anunciou a intención do club de manter ao adestrador, Fernán Varela, á fronte do equipo. “Se non o chama o Real Madrid, que tamén ten posibilidades por capacidade, pois estamos intentando que quede con nós. Non hai nada feito e por parte do club estariamos encantados de que seguira por todo o que fixo. Cando o fichamos xa sabiamos o que traiamos”, declarou.
Durán: “Agunha xogadora que temos practicamente pechada vai baixar o soldo para vir aquí”
Tamén recoñece que o propio Fernán “ten que vlaorar as súas cousas e ver o que hai”. Mirando ao plantel, Durán adianta que “é probable que teñamos un equipo máis curto porque temos que recurtar o orzamento pero iso non quere dicir que traiamos peores xogadoras. O que hai vaivos gustar moito. Aínda que non somos un club que paga moito, gañámonos un respecto. Se quitas os tres primeiros e os vascos, que teñen máis orzamento, nos estamos á cabeza en seriedade cos tratos coas xogadoras. As xogadoras falan e podo dicir que algunha xogadora que temos practicamente pechada vai baixar o soldo para vir aquí, que non é o habitual”, confesa.
O presidente incidiu en que a LF Endesa vai camiño cada día de ser máis profesional: “Esta liga estase profesionalizando moito e é unha das máis fortes de Europa, por non decir a máis forte. A ver se as institucións móvense, porque é unha pena perder unha praza que gañamos nestes anos. Isto necesita de máis axuda”.
Manuel Durán: “Esta liga estase profesionalizando moito e é unha das máis fortes de Europa, por non decir a máis forte”
Volverá Esther Castedo ao Ensino?
No apartado de fichaxes, un nome destaca para a vindeira tempada. Esther Castedo formouse na base do Ensino, e despois de pasar polos EUA, é unha das posibles pezas para o club lucense na próxima tempada.
“Loxicamente Esther e calquera galega interésanos. Imos intentar fichar se podemos, se está no noso rango do que podamos facer. Cónstame que a predisposición é moi boa, pero non sei os plans que ten a curto prazo. Foi en categorías inferiores Fernán o seu adestrador, imaxino que se segue con nós sera un punto a favor tamén. Oxalá poidamos fichala”.
Ver esta publicación en Instagram
A isto, Durán engade que a presenza de Fernán Varela no banco incentivou a afluencia na bancada. “Nós o que buscamos é iso. Se sae calquera xogadora de Lugo ou Galicia estariamos encantadísimos de traelas aquí. Estamos detrás disto. Primeiro españolizar o equipo, de feito eramos un dos equipos con máis xogadoras nacionais, canto máis galegas, mellor. Por todo, por arraigo, por fomentalo e que a xente veña vernos”.
